سالت نفسي كتير ؟؟؟
اروح ؟
ماروحشي ؟؟
انا لازم اروح بقي ؟؟
صحيح منقطع عن الدخول الي الموقع وبادخل علي فترات متقطعه ومعظم دخولي لصفحه الاجتماعيات مهيالي ماليش غيرها في سماعي الان هي وصفحه الشعراء ؟؟يعني هو انا هاعمل ايه تاني غير كده ؟؟؟حتي ممكن يكون فيه حاجه تتعمل بس مابتتعملش لاني عندما دخلت سماعي انضممت لسببين اولهم هو العثور علي الكنوز العظيمه والكثيره جدا والنادره جدا واللتي ليس لها مثيل علي مستوي جميع المنتديات (هذه حقيقه )المهم ......نهلت من الكنوز اغلبها ان لم يكن كلها وبقي السبب الثاني الا وهو المبدعون ؟؟؟؟؟رحمه الله عليهم ....فقد وجدت نفسي اغني اغاني اساسا سمعتها وعرفتها جيدا في سماعي ووجدت اساتذه يعيدون توزيع هذه الروائع كل بطريقته وعلي حسب امكانياته وطبيعي جدا ان اطمع في ان اغني علي موسيقاهم اعذب الالحان اللي غنيتها في حياتي الغنائيه الممتده من اربعين عاما ؟؟لاني فضلت كتير اغني ماهو موجود في سوق الغناء وانا المتربي علي حب وسماع هذه الاغاني القيمه الرائعه والاصيله والكبيره ووجدت من تواصلت معهم وتواصلوا معي من خلال قسم المبدعين ووجدتني اتواصل معهم في اقسامهم وفي مواضيعهم وفي تحليلاتهم ووجدت بجانبي اخوه اعزاء كبار وشبابا واعدين واصواتهم رائعه وغير موجوده في سوق الغث وصارت بيننا منافسه جميله في طريقه غناء هذه الروائع النادره واللي ماحدش بيفكر يغنيها ويعيد تسميعها للناس خارج سماعي كما فعلت انا ؟؟
المهم
اتقفل المبدعون واتقفلت معاه دماغنا ؟؟؟وقلت قيمتنا لاننا مابقيناش نغني اغاني محترمه وتفرغنا للغناء السوقي الموجود
ومابقاش لينا لزمه كلنا ندخل سماعي ؟؟
ولكن ولااخفي سرا عليكم
انا ادمنت سماعي وكل يوم اول صفحه بفتحها هي سماعي وادخل متخفيا او زائرا وكفايه اطمن علي صحابي واخواني واخواتي من خلال الاجتماعيات وايضا دخلت مهنئا وخرجت بعدما هنات اخي ابو سيدي برهان الي ان وجدت هذه الدعوه الكريمه من اخي الكريم رضا رشيد ووجدت اصدقاء واحباء يعلنون عن قدومهم وحضورهم تلبيه للدعوه ووجدتني اراقب اليوم اللي فيه اللقاء وتوجهت الي زهره البستان اللي باروحها اول مره ؟؟ومارضيتش اكلم الالاتي ولا المشاعلي اللي معايا تليفوناتهم وقلت اعملها مفاجاه لان كل من كان موجودا لم يتوقع او يخمن اني ممكن احضر بس انا روحت متشوق لمقابله ناس بحبهم من كل قلبي وكان نفسي اشوفهم وكنت محروم حتي من كلامهم علي صفحات سماعي بس لقيتني تايه ؟؟؟؟واخر ماتعبت من اللف اضطريت اكلم الالاتي وهو نفسه فوجي بمكالمتي ومايعرفش انا بكلمه ليه ولقاني بساله فين زهره البستان ؟؟؟وضحك بشده ووصفلي واستناني ومادخلش الا واحنا مع بعض ومن لحظه ماوصلنا توافد الاحبه الغاليين كل عملاق عظيم باسمه واخيرا لقيت صدري اتفتح تاني للدنيا لاني قالت اهم واحب ناس في الدنيا واستمتعت معهم كثيرا استمتاع المحروم من احبته وجالست وحاورت وتعرفت علي اساتذه وشخصيات محترمه كماهو حال سماعي وفرحت كثيرا بهذا اللقاء اللذي ارجو من الله العلي القدير ان يمدنا الله في اعماركم ويمتعكم بالصحه والعافيه ونجتمع مره اخري ومن كان لم يستطع الحضور اتمني ان نراه في المره القادمه ياعمنا الكبير د انس والست الهانم الوالده الكريمه مدام ناهد واتقدم بوافر الشكر والتقدير والاحترام للاخ الحبيب رضا رضيد صاحب الدعوه الكريمه كما اعلن عن شديد فرحتي بمقابله زعيم المعارضه الشاب الوسيم حسن كشك والاستاذ محمود العيادي والدراويش كلهم من حضروا ومن حادثتهم والعزيز الباشا قمر الزمان والجميل التشادي سيد المشاعلي والصديق الصدوق اللي انا مقصر فيحقه الالاتي وحبيبي غازي الضبع وعمي وعم بلدي والبلاد اللي جنب بلدي ابو الامير علي الكريم الوجيه الانيق الحبوب العالم المتعلم سياده رئيسي المفدي صلاح علام والتحيه الغاليه للعظيم ابو محمد الاستاذ عادل ربنا يجيبه بالسلامه لمكالمته الجميله اللتي ذادت اللقاء بهجه وسرور والوقور المحترم الاستاذ كمال عزمي والحبيب الحاج احمد عبد الهادي حامي حمي التراث الشعبي والغالي عماد باشا جمعه والجميل المحترم ايهاب بك عامر العامر قلبه بالحب الكبير لكل الناس والاستاذ الدكتور زوج مدام عفاف سليمان والسيده حرمه مفاجاه اللقا وبناتها والاخ الحبيب جدا محمد رمضان ماضي والسيده حرمه ولاانسي ولااستطيع ان انسي ابدا الحبيب الاحب والعزيز الاعز والكبير في مقامه واحترامه ومحبته استاذي واخي وعمي وابي وخالي عمي الباشمهندس محمد علي وصحبه الكريم اللي ذادنا نور بتشريفه وعاجز عن شكرك لكلامك الكبير قوي ياعم محمد في شخصي المتواضع
اشكركم جميعا يامن اسعدتونا وامتعتونا وابهجتونا بلقائكم
ويارب ماكونش نسيت حد ؟؟؟ولو نسيت سماح مقدما
وكل عام وانتم جميعا بخير
وكفايه اني شوفتكم واطمنت عليكم يااعز واحب خلق الله
واليكم جميعا اهدي احدي اغنياتي في البومي الجديد المنتظر في اول ايام عيد الفطر المبارك
خلي الطابق مستور؟؟؟
ده اسم الاغنيه في المرفقات وهي اغنيه بدويه قديمه غناها الفنان الكبير خميس المجعاوي