[حسن كشك]

المشاركة الأصلية كتبت بواسطة ثومة 72

ايه يا عم حسن ايه الروائع دى يا اسد الاسماعيلية

بجد صور تحفة للمذيعة امانى ناشد والمذيعة سلوى حجازى رحمهما الله وغفر لهما

وحلوة حكاية الصور بتاعة التلفزيون لحدى ما يفتح الا ما كنتوش بتزهقوا وتملوا من الصورة دى كل يوم ؟؟؟

نزهق ازاى ... دا احنا كنا مدمنين للصوره دى ... وكنا نفتح التلفزيون قبل ما تظهر الصوره كمان ونستمتع ب ( وششششششششششششش ) والنقط السوداء والبيضه اللى كانت بتملا الشاشه بدون ارسال ونتخيلها مليون حاجه .... ياثومه التلفزيون كان بيفتح الساعة 6 ويقفل الساعة 9.30 او 10 بالكتير اوى وقتها ....
طيب ها اقولك حاجه .
جمال عبد الناصر فى بداية دخول التلفزيون مصر .... كان هناك طرازان اول دخولهم مصر
تلفزيون (PYE) هولندى تقريبا وكان 17 بوصة وكان كله مصنوع من البلاستيك والناس بتخاف يسيح من الحراره فكانوا بيقفلوه كل مده عشان يبرد وتلفزيون ( Toshiba ) وكان يابانى 15 بوصه وكان الهيكل من الصاج ومكانش مطلوب اوى عشان يابانى الصنع ( تصورى ) وكان سعر التلفزيون حوالى 70 الى 75 جنيه مصرى وكان يعتبر سعر غالى مايقدرش اى حد كتير يشتريه فى مصر وكان بيتباع بالحجز ....
فجمال عبد الناصر نزله للناس بالتقسيط ... تقريباً مقدم 20 جنيه اواقل والباقى على دفعات خمسه جنيه فى الدفعة ... وبرضوا عشان الناس اللى مايقدروش على التقسيط ... قام جمال عبد الناصر بتكليف وزارة الاعلام ( الارشاد تقريبا وقتها ) بعمل اكشاك كبيره فى الميادين والحدائق ويتم وضع جهاز تلفزيون فى واجهتها ... والناس تتلم بكراسيها فى الحدائق والميادين عشان تتفرج على التلفزيون فى ساعة العصارى الجميله . وكانت الاكشاك منتشره فى كل مصر
...
واحنا عندنا فى العيله ... كان ابن عمى الكبير بيدرس الطب فى المانيا الغربية وقتها .... وقام سنه 1959 بشراء جهاز تلفزيون وارساله الى والده ( عمى ) وكان من طراز (Grounding ) ... وكنا نروح بيت عمى ونفتح التلفزيون ونتفرج على الوشششششششششش لأن مكانش فيه ارسال تلفزيونى وقتها فى مصر ....ومكناش مصدقين ان البتاع ده ابو شاشه زجاج غامقه ممكن نشوف فيه المذيعين والافلام ....
أيام .....كانت جميله