[على عبداللاه]

وبس أمته تمطرى










برقك ورعدك صدعنا وعمانا



وحبله سماكى .. ألمها فـ بكانا



ولا شفنا منك مطر يروى غيطنا



ولا بعدنا عنك يا عايشه فـ دمانا



ونجرى ونهرب وشايلين خيبتنا



نلاقى السواقى بتهرب معانا !!



ولا ميه طلعت وجابت سيرتنا



ولا يوم فارقنا شعور المهانه



ولو يوم تاريخك هيوصف فى بيتنا



بقولك مشاعر تنوح بالأمانه




...




يقولك سماكى بدون المطر



وشعبك بيخرس فى وسط الخطر



ولا عرفنا ليه زلزلة دى الجبال



ولا فهمنا إنه مرض وإنتشر



ولا شربنا ميه تجيب إنفعال



ولا ثورنا زى بقيت البشر



وهل فى الظلومه تموت الرجال ؟!



وهل يعجبك رب بيت إنكسر ؟!




...




بلادى بحبك وعاتب عليكى



وكان نفسى ألملم فى نفسى وأجيكى



وأخدم ترابك يا غاليه عليا



أبيعلك حياتى وأقول مشتريكى



لقيتك بعدتى فمديت إيديا



جرحتى كرامتى بقيت مش لاقيكى



وبس مين غيرك إنتى اللى ليا ؟!



ومين فى الشدايد بعمره يهاديكى ؟!




...




سماكى بلادى بدون الكرامه



وعاشق ترابك ولولا الملامه



أزعق وأشتم وأسبك وأحبك



وأفضل أحبك ليوم القيامه



ويحزنى إنك قلعتينى منك



وشايف مكانى معلم علامه



أقول إبدرينى أكون تانى زرعك



ولكن يا بلدى دا زرع الندامه




...




زروعك بدون الرعايه تموت



بتنتج خلايق ملاها السكوت



فهل يا بلادى أنا المفترى ؟!



وهل يعجبك تتقفل دى البيوت ؟!



وهل للعداله ظهر مشترى ؟!



يقول الحقيقه ولا يخشى موت !



وهل يا سماها بقه تمطرى ؟!



ونسمع لكل الخلايق دى صوت !






سبب النص ده



أثناء قرائتى للقران لاحظت الترتيب العجيب فى الأيات دى



يقولُ الله تبارَك وتعالى: ﴿إِنَّ اللهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ وَإِذَا أَرَادَ اللهُ بِقَوْمٍ سُوءًا فَلاَ مَرَدَّ لَهُ وَمَا لَهُم مِّن دُونِهِ مِن وَالٍ {11} هُوَ الَّذِي يُرِيكُمُ الْبَرْقَ خَوْفًا وَطَمَعًا وَيُنْشِىءُ السَّحَابَ الثِّقَالَ {12} وَيُسَبِّحُ الرَّعْدُ بِحَمْدِهِ وَالْمَلاَئِكَةُ مِنْ خِيفَتِهِ وَيُرْسِلُ الصَّوَاعِقَ فَيُصِيبُ بِهَا مَن يَشَاء وَهُمْ يُجَادِلُونَ فِي اللهِ وَهُوَ شَدِيدُ الْمِحَالِ {13}﴾ سورة الرعد




لفت نظرى جدا إن البرق وثورته ييجى فى الترتيب بعد الحث على تغيير النفس للصالح



ملاحظه غريبه



لكنها أفضت للنص



تحياتى




على عبداللاه

المنصورة فى 29 / 6 / 2010