معنى الوطن
إبنى سألني
هو أيه معنى الوطن ؟
يعنى بيت ؟
ولا سكن ؟
وليه نحب تراب بلدنا
حتى وإحنا فى المحن ؟!
وليه بتوجعنا أوى شتمة بلدنا ؟
قول يا والدي دلني
هي اللي بتقسى علينا دى بلدنا ؟
هو غربتنا جواها تفيدنا ؟
هو خيرها وكل طيرها
كل بنيانها وشجرها
لما ياخده حد غيرنا
يبقى أيه ؟ حابه تعاندنا ؟!
لو بتحبنى سبنى أهاجر
سبنى أدورلى على أرض تعاهدنا
تحتوينا بكل خيرها
هو يابا اللقمه لما تتغمس تراب
ينفع ناكلها ؟
هو بلدى لما تزلنى زله كلاب
أفضل باقيلها ؟
سؤال يحير
وجالى من إبنى الصغير
من ضنايا
صحى جوايا المواجع
مـ البدايه
من زمان
عصر سموه إحتلال
يااااه
يااه عليه حتة سؤال
لكن جاوبته
قلتله معنى الوطن
قلتله
يا صغير السن أفندى
وطنى عندى
يبقى والدى
دفع حياته كلها عربون سعادتى
إزاى أسيبه وأنتسب لحد تانى ؟!!
أبقى أنانى
وطنى ده يبقى أنا
شايل فى قلبى سوسنه
متحاوطه بالشوق والأمانى
وطنى خزين الذكريات
وطنى الحقيقه
وطنى الكلام وسط السكات
وطنى دا أمى
تضربنى وأجرى لحضنها
وأحبها حتى الممات
هو ينفع إنى أهرب منها ؟!!!
هو ينفع إنى أبعد عنها ؟!!
فى بعدها يروح الأمان
وفـ بعدها راح أعيش مهان
وطنى خليه نحل
وإحنا النحل
لو ينقلوا مره الخليه من مكانها نتوه
ولما ياخدوا فـ يوم عسلها وينهبوه
يفضل لنا سكر وميه
يعيشوا بيه كل الخليه
يغيرووه
يصبح عسل صافى
ييجوا تانى يسرقوه ؟؟
وأيه يعنى لما يسرقوه
هيفضل لسه فى الخليه النحل
انت وأنا وغيرنا
بالوحده يتظبط مصيرنا
يبقى ويانا العسل من تانى
نلقى لقمه حلوه
وضحكه حلوه
بالحب يتطيب خاطرنا
وطنى إنت
وإنت لما تسيبنى أموت
دا إنت كل الروح
بعدك ما تلزمنيش بيوت
يا هلترى ينفع تسيبنى ؟!؟!
رد يابنى
رد يابنى