[علاء قدرى]

المشاركة الأصلية كتبت بواسطة Tarek Elemary

أنا ...

مش ضد حد

أنا ...

مش ويَّا حد

أنا المصرى ... اللى بانى المجد

رعيت الشاة

حفرت قناة

هزمت طغاة

بنيت السد

و ابان فى المحنة ساعة الجد

نصرت الدين

و لا الضالين

هتفت آمين

أدَرْت الخَد

و برضه باقول مانيش مع حد

و مش عاوز من الدنيا سوى حقى

و لما أصرخ و استنجد ألاقى رد

و سقف يتاوى أولادى

و لقمة تقول يا جوع إتهد

و شَربة مية تروى الريق

من الأبريق أعطَّرها بمية ورْدْ

مش تقتلنى بالفيروس

و تبقى كابوس

و تتورَّث لِوِلْد الوِلْد

و هِدْمة يادوب تدفِّينى

و تحمينى فى ليل البرد

و لا تفرق معايا مين هايورث مين؟

و مين الأب مين الجد؟

و مين يُحكُم و مين يِصْلِحْ

و مين يِجمَع و مين يِطْرحْ

و مين أبرَعْ فى فن العَدْ

أنا موافق على اللى يِكْون

مادام ده أمر رب الكون

بكل الحُب كل الوِدْ

أنا و لا حاجة تعنينى

سوى دينى

و قوت اليوم و شمس الغد

لكن حقى ما عادش يبات بعيد عنى

و لا هاصبر بوعد عشان يطَمِّنى

وعودكم دول رصيدى فى بنك يبقالك

يا طول بالك

يا مصرى لما يبقالك

ديون على حد

تموت م الجوع و لا تقدر تطالب بيه

كسوفك ليه؟

خرس صوتك و زاد ع الحد

و أموالك لهفهم بيه من إياهم

و على بره رحاله شَد

لكن و الله ما عاد ينفع سكوت تانى

على حقوقى اللى طول عمرى مفارقانى

و وحشتنى حقوقى بجد

عاوز أمشى فى شارع فيه مكان ليَّا

و ألاقى إحترام للناس

و ألاقى أمان و حرية

و لما كبير يجور بالزور

ألاقى قانون مالوش مية لون

بلا تليفون فى ودنه يرن

يعمى عيون

تفرَّق بين غنى و مَطْحُون

و قاضى سيف ماهوش يويو

ما يقبل شئ يفوق الحد

و أملى ف بكرة مش أوهام

و لا كلمة فى وسط كلام

و مش هافضل كتير مغلوب

أكيد و لابد

ييجى اليوم و هافرح فيه

ساعة لما الحقوق تترد

و برضه هاقول مانيش مع حد

صديقى الجميل الشاعر طارق العمرى
انا معاك ... مانيش مع حد؛ ضد حد؛
الله عليك لما تكون نفسك ؛ موش حد تانى ؛ اعظم موقف ياخده الحر ؛ ان يكون نفسه
لا فرد فى جوقه؛ ولا لابس قناع؛ ولا مخادع ؛ ولا ملاوع ؛ تلك حرية كامله
يفتقدها الكثير وبسببها ايضا قد نفقد الكثير ؟؟
عموما بدون مجاملة ؛ حالة رقى عظيمة ؛ فى اختيار الفكرة ؛ و المفردات ؛ و الموقف المعلن ؛ وان كان الحلم صغيرا
الا انه (شبه مستحيل) فى حالة تستحق التامل؟؟؟؟؟