[علاء قدرى]

المشاركة الأصلية كتبت بواسطة Tarek Elemary

دم الشهيد

========

الشين شرف يا ولد و الْههْ هَوان الروح

و الياء - برغم الألم - يحرم عليك النوح

و الدال دموع الوطن تسقى النخيل و الدوح

طلْع النخيل للسما رافع هامَاته تِطُوْل

و قال إحنا من جَهْلِنا

بنقول عليك ... مجهول!!

***

رمضان بينده يا شهيد

ياللى روى دمك تُرابها و رمْلها

م الأربعين لما لشوارع بورسعيد

العيد دخل يا بطل

و الحلوة متزوقة و زاينها لبس جديد

مستنياك على أمل

تكتب كتابها بقى و تقيموا عرس سعيد

جالها الخبر و إنفجر

و العمر دا مواعيد

بالدم كتب الكتاب

إسمك شهاب بيقيد

***

حان الأجل يا بطل ...

يا إسم من بنور

يا اللى نويت الصوم بدون أمل فى سحور

و فطرت ساعة القضا حواليك بنات الحور

***

إنت زرعت الأمل

و اللى حصد إحنا

جسدك لقبرك نزل

غنينا و فرحنا

و رفعنا راسنا لفوق

و إنزاحت المحنة

على جثتك يا شهيد

يا رب سامحنا

***

سؤال برئ و إتسأل

و لا إتسال فينا

لو يوم عرفت إننا

هانبيع ترابها بمال

علشان رجال أعمال

هل كنت تحمينا؟

و تجود بروحك فدا

علشان تراب سينا؟

و بقينا من صمتنا

إحنا حلال ليهم

و همَّ و بظلمهم

برضه حلال فينا

صديقى الشاعر الجميل طارق
الله ينور عليك يا شاعر ؛ قصيدة فى وقتها ؛ موش بس عشان حرب 73 لا دى عشان كل حر شريف ؛ شايف الحرب مانتهتش؛ وانا شايف صورة الشهيد فى كل انسان عفيف؛ يناضل بشرف من اجل الحق؛ و الخير و الجمال ؛ والامثلة كتير لناس ماتت من غير حرب تقليدية ؛لكنها ماتت من اجل فكرة ؛ فين جمال حمدان ؟؟ قاتل من اجل النور و العلم و التاريخ؛ مات كما تموت العير؛ وحيدا ؛ تحاصره اعماله التى قاتل من اجلها ؛ ورفض يبيع كما باع الاخرون .
معلش انا شردت عن الموضوع الاساسى لكن برضه لسه فى حرب مع الفساد ؛ واللامبالاه؛ واللاانتماء؛ حرب مع الباطل ؛ ولسه فيه ناس بتموت و هم احياء من اجل الدفاع عن الحق .
كلامك طالع من القلب يا شاعر فلابد وان يستقر فى القلب ؛ طبت ؛ وطاب قلمك