[علاء قدرى]

المشاركة الأصلية كتبت بواسطة ناصر دويدار

أوكورديون

وبنت بملاية
بتوّنسه
على كعب كوباية
عيال بتلعب بلى
وعيال تلف النحل
وعيال بتلعب أستغماية
بنت وولد واقفين من الشبابيك
وبيبدأوا حكاية
بنت وولد تانيين
عطوا ضهرهم للبحر
وبيبدأوا نهاية
وعيون بتشكى واد شقى لامه
زغللها بمراية
راجل على عكاز
جرنال بيجرى
من تحت نضارته الأزاز
على الجدار الجير
واقف فى برواز كبير
أبويا بعصاية
ريحة الطعمية فايحة
والزيت بيقلى
قرن شطة إسرائيلى
ولمونة بتنزل دموعها فى صحن فول
راديو قديم
وصوت حليم
بيقول
(أنا لك على طول)
أوكورديون
رغم أحزان الشوارع
لسه

بيقوووووووووول

يااااااااااااه
صوت اوكرديونك فكرنى بلقطات زقاق المدق (نجيب محفوظ)
بس انت ليك عيون كاميرا مدهشة ؛ تلقط بيها كادرات منفصلة من الوجع ؛ و الدهشه ؛ والحلم الجميل ؛ كاميرا ابيض و اسود؛ حريف اصطياد خلفيات المشهد الرئيسى ؛ ابطالك شخوص معروفة للجميع ؛ فكلنا انت و لكن لك وحدك كاميرا الحروف ؛ احيانا بحس انك لا تفارقك الذاكرة ؛ ولا تخونك حين الاستدعاء ؛ رغم ان الجميع اصابه مرض الزهيمر من طول الاحداث المتلاحقة ؛ و مطاردة التفاهات اليومية لنا ؛ نعم اصابنا الزهيمر اما انت فاصبته فى مقتل
اللهم لا حسد