بص يا معلم علاء
أنا بجد البنت اللى بحبها هى كده
مبهرة
هى لما تمشى
بتمشى معاها
طواويس
هى حضورها
زى حضور الميه والشجر
هى حالة بتملى عليا الوجود
وتخلق قصادى من الشوك ورود
وتفتحلى عالم
مفيش له حدود
هى حدوتة وحكاية وقصيدة وأغنية وبحـــر وسما وأرض وبشر وزرع أخضر وأغانى فيروز وشعر محمود درويش وصلاح عبد الصبور وأمل دنقل
وسهوكة زبيدة ثروت فى فيلم
يوم من عمرى
وأغنية وردة
(انا على الربابة بغنى)
لما أنتصرنا فى 6 أكتوبر
هى ريحة الحنين والحنان والأمان
أنا فعلاً
بحب البنت المبهرة دى
مش عايز حد ينوق ولا ينبر فيها
لأنى بقالى 46 سنة ماشوفتهاش ووحشانى مووت