لو ما قدرتش تسعد غيرك
ما تبكيش يوم حد
أصل البُكا حراق
بيعيش صوت ع الخد
يفضل يلمع
يبعد يرجع
ينشف يصبح
جـــرح بجد
ما تبكيش يوم حد
كلمة ظلم تفوت ع العين
تنزل دمـــع
كلمة ظلم تخش القلب
تطفى الشمع
حاسب من غلطة على لسانك
وياريت يبقى العـفـو حصانك
يرمـح يعـفــى
يضم يدفــى
الناس من البرد
ما تبكيــــش يوم حــــــــد
ما تدخلش فى قلبك حد ما تعرفهوش
واللى يحبك
حبه بجد ما تجرحهوش
كون إنسان على طول الخط
وأبقى لكل غريق الشط
سلم تسلم
وأحلم أحلم
عيش بالحب
أرخــــى وشد
ما تبكــيـش يوم حـــــد