وجع صيفى
أنا كل يوم بيدبحنى الحنين
وف كل طلعة شمس
بيخش الشجن
مزيكا ع الرئتين
دمى ورق نعناع
وصدرى وطن للكمنجات الشريدة
ضوافر الاوتار
بتتعلق ف شجرة النعناع
ويبتدى عزف النزيف
فيسقط الصفصاف
حـــزين
ويغمض النعناع
ف هجرة العصافير
ويتملى أسفلت روحى دم
كان نعناع
فنزل فى بير روحى الغويط
أدوّر عن ولد كان جن
كان يتنطر زى البريزة
يــــــرن
يجرى ف قلب المطر
ويفر طوقه العجل
يلعب مثلث بلى
ويلف نحلة خشب
كان له خلان وخالات
وأخوان وأم وأب
وأصحاب ولاد وبنات
وف كل شارع عـم
كان له دفاتر رسم
ومسطرة وشنطة
ومريلة كحلى
وجزمته بتلمع
كان له نشيد الصبح
بيقوله ف المدرسة
كان له زمان مدرسة
ومُدرسة قمحى
تشبه رغيف القمح
نزحت بير روحى الغويط
فا لقيت الولد
مشنوق على حبل الوطن
زى مناديل الوداع
بيرفرف
بره البـــــدن