[Tarek Elemary]

لو كان قليبى سكن

هايساعى كل الكون

شايل هموم الوطن
غير الهوى المكنون
و الذكريات والشجن
و حلم ليل مسجون
بين الضلوع إندفن
يمكن يكون مجنون

***
يا فاتحين الأمل شباك

على بكرة اللى جيَّ هناك

و بكره فوق جناح شوقه
يقول للفجر فين مرساك
وخيط الشمس بيه نغزِل
ستاير دفء ع المنزِل
و منزلنا حيطانه طموح
و آه لما الطموح يرحل
لا يبقى بيت و لاستاير
و لا شاطئ لموج حاير
و نبقى فى الطريق مساكين
نلف العمر فى دواير

***

يا ناس يا خلق يا إنسان

شربنا من الألم ألوان
تعالوا نداوى أحزانَّا
نقابل بعض بالأحضان

نحب الخير لكل الناس

و يبقى الليل قمر ونَّاس

و نبقى فى القلوب جِيرة
و عِشْرَة و المَوَدَّة أساس

***

بالأمثال و بالأديان و بالخبرة

و لا يقدر على الأيام و ع القدرة

سوى الخالق و رب الكون
و لا نضمن نَفَس يِطْلَع
و لا نضمن نِعِيش بُكرة