[Tarek Elemary]

أنا فارس


========


يا ظالم فى الهوى قلبى و قِدِرْت تخون


و ناسى الحب و هوايا عليك بِيْهُون


أنا مُمْكن أكون خايف على شْعُورك


لكن عمرى ما يوم هَاقْدر أكون مجنون


***


أنا فى الحب مِشْ صيَّاد يا طيرى


و أضحى بفَرْحِى لو تِدْمَع عيون غيرى


و أنا فارس على باب الأدب حارس


و لو كل البشر مالوا أنا باقى على سيرى


***


و مهما الحُر شاف يِفضَل فى نَفْسُه حُرْ


ولو يوم ضِحْكِت الدنيا و شَاورِتْلُه بزِينَه تْغُرْ


يِدوس الزينة لو حتى جبال من مال


و يِسْتَبْدِل بزُخْرُفْهَا شَرَفْ يمكن بِطَعْم المُرْ


***


أنا ماقْدَرْش أكون خاين لعشاقى


و لا هاقدر أبيع بالحب أخلاقى


و لا يمكن فى يوم هاقبل أكون تافه


و لو ضاع الشرف منى ...

ماليش من بعده شئ باقى