[علاء طه ياسين]

ياللي تمللي باشوفك دايما
روح شفافة وقلب حنون
اللي مابينا عمر بحاله
يمكن قبل بداية الكون
بتحبني أكتر من روحك
وبأحبك انا أوي بجنون
واتحديت في هواك العالم
واللي يكون ياحبيبي يكون

انت يا أجمل قلب صادفته
ونسيت ويا هواك الحيرة
بعد ما عشت انا طول ايامي
لدموعي وأحزاني أسيرة
شوفتك فجأة ف ليل أحلامي
فارس وانا في الحلم أميرة
حسيت إني بجد عرفتك
قبل سنين وليالي كتيرة

انت يا أغلي الكل عليا
جوة ملامحك شايفة انا نفسي
شايفة في نغزة خدك قمري
شايفة ف ضي عيونك شمسي
وبادوب أوي وباضيع بسهولة
لما تصبح .. لما تمسي
وانت كتاب مفتوح قدامي
باكتب فيه وشوشتي وهمسي

انت يا فجر جميل صحاني
بعد ليالي من الحرمان
موجة حبك فين وخداني
مش عارفة .. ولا عاوزة كمان
ياللي بتهدي الأفراح ليا
وأنا بهدي لك شوق وحنان
انت حبيبي وحبك توبة
بتطهرني من العصيان

علاء
....