(أيادى مصريّة)
بايقاعات زهديّة بقطفات سمعجيّة
لولا الفلاح – ماكان التفاح
ولا كان الخير يملى بيوتكم
فى إيديه الفاس- لولاها ياناس
ماتلاقوا الدنيا ف دنيتكم
شاف منكوا زمان- أشكال وألوان
وسامحكوا وسامح غلطاتكم
وما كانش بخيل – على أرض النيل
طول عمره بيتعب لراحتكم
طول ليله سهران- ونهاره عرقان
بشقاه بيكمّل فرحتكم
ياما بات مهموم – وماضاقش النوم
علشان بيوفر لقمتكم
وقضيتوا عليه- ماسألكم ليه؟
وداريتوا عنيه عن أفعالكم
عند الأسعار- عاملين له حصار
وبأىّ قرار بيسلمكم
ولا فى المحصول – من حقّه يقول
ولا كلمة تكسّر أوامركم
ولا فى التطهير- ولا فى التطوير
من حقه يراجع فواتيركم
وجنابكو يقول- يدفع على طول
لو حتىّ ح يشحت على بابكم
تبيعوله مبيد- ثروتكوا تزيد
وما حدّش يقدر يحاسبكم
لازم يرتاح- ويعيش فى براح
وكرامته ترادح كرامتكم
على شط النيل- ح يقول مواويل
ويكون اللحن ف غنوتكم