[سعدالشرقاوى]

(أيادى مصريّة)
بايقاعات زهديّة بقطفات سمعجيّة






لولا الفلاح – ماكان التفاح
ولا كان الخير يملى بيوتكم

فى إيديه الفاس- لولاها ياناس
ماتلاقوا الدنيا ف دنيتكم

شاف منكوا زمان- أشكال وألوان
وسامحكوا وسامح غلطاتكم

وما كانش بخيل – على أرض النيل
طول عمره بيتعب لراحتكم

طول ليله سهران- ونهاره عرقان
بشقاه بيكمّل فرحتكم

ياما بات مهموم – وماداقش النوم
علشان بيوفر لقمتكم

وقضيتوا عليه- ماسألكم ليه؟
وداريتوا عينيه عن أفعالكم

عند الأسعار- عاملين له حصار
وبأىّ قرار بيسلمكم

ولا فى المحصول – من حقّه يقول
ولا كلمة تكسّر أوامركم

ولا فى التطهير- ولا فى التطوير
من حقه يراجع فواتيركم

وجنابكوا يقول- يدفع على طول
لو حتىّ ح يشحت على بابكم

تبيعوا له مبيد- ثروتكوا تزيد
وما حدّش يقدر يحاسبكم

لازم يرتاح- ويعيش فى براح
وكرامته ترادح كرامتكم

وعلى شط النيل- ح يقول مواويل
ويكون اللحن ف غنوتكم