مانكرشى
صحيح باهواكى مانكرشى
و أبيع العمر علشانك
لكن نفسى مابتهونشى
و أعيش أستنى إحسانك
أسامحك آه
لكن قلبى ما يقدرشى
يكون مش مَلْوْ أحضانك
و مهما هواكى كان برضه
ما باقبلشى ....
.... يكون حبى
خبر فى طى كتمانك
***
أنا قلبى يعيش مكسور
يعيش مجروح لكن فى النور
و لا يقبل يكون فى نعيم
لكن مسجون و حواليه سور
دا قوت الحب حرية و عفوية
و لا ينفع يكون فى الحب عبودية
و حتى الطير ما يبقاش طير
و لو بيته قفص بنور
بيهرب منه مهما يكون
و يبنى من الحطب عشه
فى حضن النور
***
و لو مرة الفؤاد ميل
و ليل شعرك عليه ليل
ما عمره يوم هايتخيل
يكون حبك و حبى زور
و أنا الترياق لحرمانك
__________________
دى فضفضة من قلم رغم الألم ... حسَّاس
مهموم بِهَمْ الناس
يمكن تضيئ كلمته ... العقل جوة الراس