الفاكهة أشكال و ألوان
و أنا مُعْجَب بيها و ولهان
تطلب ايدها من الفكهانى
تسمع منه طقم حنان
***
و يلِفَّك لَفْ الحَلَزُون
جوِّة الكيس سِر و مدفون
ترجع بيتك نافخ ريشك
جايب فى البرازيل مية جون
***
تِفْتَحْ كِيسَكْ تِلْقَى عَفَانَة
الفاكهةكُلَّهَا تَلْفَانَة
شَكْلَكْ يِبْقَى بْجَدْ يَزَعَّل
عَنْد الحُرْ دى تِبْقَى إهانة
***
و تْرُوحْلُه يِزَعَّقْ و يْبَوَّقْ
يُشْخُطْ و يْقُولَّك ما تْرَوَّق
أنا عَبَّيت قُدَّامك حاجتك
من وِشْ القَفَصْ المِتزَوَّقْ
***
ده بقى حال الكل وحالى
مش قادر أنسى اللى جرالى
الفكهانى خدعنى و فاتنى
نادم على تَغْفِيلى ليالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!
__________________
دى فضفضة من قلم رغم الألم ... حسَّاس
مهموم بِهَمْ الناس
يمكن تضيئ كلمته ... العقل جوة الراس