متغربين عنك يا مصر .... و عن عيونك محرومين
و الزمن واقف ما مر .... و الساعات بتفوت سنين
مش بنملك غير خيال .... نسرح و ف عنينا الدموع
نفوق و ف بالنا سؤال .... آمته هايكون الرجوع
و عواطفى ف قلبى دفينة .... ما يدرى بيها الجيران
و انت ف عينى سفينة .... مرساها بر الأمان
أركب و أرمى حمولى .... و أقول بلاش العتاب
أسمع ما انتى تقولى .... أحضن و ابوس التراب
يا غربتى لا تطولى .... دى مصر الطعام و الشراب
و انا سمكة ف بحر الكنانة .... لو اطلع منه أموت
و القصر بره الكنانة .... ف عيونى قبر و تابوت
أرجع ياغربة أمانة .... قبل العمر ما يفوت
و ألاقى الغربة بتكدب .... و بعدى عنك يطول
و مهما القلب يتعذب .... ما يوم عنك ها يتحول
ف نار البعد أتقلب .... يزيد حبى عن الأول
يزيد حبى عن الأول
__________________
دى فضفضة من قلم رغم الألم ... حسَّاس
مهموم بِهَمْ الناس
يمكن تضيئ كلمته ... العقل جوة الراس