الـزخــم الـجـمـالـي
لحظة مابتفوتني صورتك
وثابتة اشراق في خيالي
يامناي واحلي قصة
وصبري للشوق واحتمالي
عاوز اوصف اغني ليكي
انتي يا الزخم الجمالي
****
عايز اقول بس مابِطولك
حرفي يا ضل المحنة
انتي اعمق من حروفي
انتي دنيا وانتي جنه
غايتو كل العارفو انو
العشوق بي شوقو جنّ
****
يُومي بدعي تكوني ليا
قسمتي وسعدي ونصيبي
ابقي ليك في الدنيا راحة
وتبقي منديل لي نحيبي
ويرحل الاسف المخيم
مُدة مستوطن قليبي
****
ولما تطلع من لسانك
اوع تتأخر عليا
نفسي الغي ليك مشاغلي
وابقي جنبك يانديه
بس ظروفي وانتي عارفه
اني شايلك في عينيا
ومهما غبت بجيك راجع
شايل الاشواق هديه
****
باكر الزمن المجرتق
بالفرح لي ح يبدّر
الاماني تمد شموسا
لي ضفاف عمري وتخدّر
بكرة ايدي تلمس ايدك
وللشقي الجواي تودّر
****
حمدي السمر
* الجرتق = طقس من طقوس الفرح في السودان