الزمن قال كلمته
واتنسي حب السنين
لو دموعنا تسكته
كنا نبكي عليه يا عين
الزمن ياقلبي قادر
يجرح القلب اللي صابر
والعواطف والمشاعر
يبقوا لعبه ف الإيدين
من سنين لما التقينا
والهوا شاور علينا
وف طريق الشوق مشينا
كنا مش عارفين لفين
كنا مش عارفين ولكن
الهوا في القلب ساكن
شوفنا في كل الأماكن
حلم جاي للعاشقين
حلم خلي القلب ينسي
إننا نفكر حنرسي
فوق شطوط الفرح ولا
فوق شطوط المجروحين
والزمن فرق قلوبنا
خدنا م الأحزان نصيبنا
وارتضينا البعد لكن
برضو لسه مشتاقين
بس مهما نقول ونشكي
والعيون تحتار وتبكي
الزمن كتب النهاية
واتنسينا من سنين
علاء