بتسألينى
و بتسألينى سؤال ملهوف
و بصوت يا عينى ماليه الخوف
إوعَىَ تكون هاتفوتنى خلاص؟
و كأنى ولا باعرف إخلاص
و بين إديكى فؤاد مخطوف
قلبى أنا اللى ما يقدر يوم
على غيرك إنتى ياروحى يلوف
***
ومين فى يوم يقدر ينسى
شط لسفينته كان مرسى
و فـ حضنه شاف أحلى سنينه
إزاى بقى عليه راح يقسى
يا سنين أمان .. نهر الحنان
بالحب صافى .. دافى .. وافى
يا قلب عمره فى يوم ما خان
عمرى فـ هواك بادئ لسه
و لسه على قلبى و لسه
***
بصى فـ عيونى و ماتسأليش
بعدك أنا ماقدرش أعيش
أنا مش حبيبك و لا نصيبك
أنا ليكى أكتر و الله أكتر
فى الدنيا غيرك أحباب ماليش
بصى فـ عيونى و ماتسأليش
***
حسى بحنانى .. دوبى فـ كيانى
أنا كنت قبلك .. كتير باعانى
يا وردة نادية .. بنصيبها راضية
سحرك خطفنى و الشوق نادانى
و إوعى تقولى هاتفوتنى تانى
يا أحلى نجمة
مسَهَّرانى
القاهرة : 13/06/2009
__________________
دى فضفضة من قلم رغم الألم ... حسَّاس
مهموم بِهَمْ الناس
يمكن تضيئ كلمته ... العقل جوة الراس