النداهة
جدتي كانت دايما تحكي ..
عن جنية بتسكن شجرة ..
حلوة حلاوة ..
زي غيطان القمح الخضرا
تحت المطرة ..
شعرها أسود فارد مادد ..
زي الليل الغايب منه القمره ..
لما تشوفها هتخطف قلبك ..
وتطير بيك ف الريح العاصف ..
وهتعجز في دواك السَحَرَةْ ..
عشت الحلم وعشت الخوف ..
ساعة ما أمشي ف ضل الشجرة ..
كان الخوف ييجي يبعترني ..
ناشرة شعورها ..
غولة بتنفخ ..
أصرخ وأصرخ ..
مادة إيديها خلاص هتطولني ..
يعني خلاص هاتحول جني ..
وأجري بسرعة وفجأة أتلفت ..
عاوز أشوفها وشوفتك إنتي ..
طب مين إنتي ..
مش جنيه .. دي بنت شقية ..
اتلملمت وقلبي رجع من دنيا الخوف ..
وبقيت أضحك من تفكيري الساذج ..
واسأل ..
اسمك ايه ؟
تتصوروا كان اسمها ايه
النداهة ..
.........
ما أصعب أن تغزل حلما ..
بخيوط الوهم السوداء ..
...........
|