جي من أقصي الجنوب ..
يمكن ألحق فرصة في الشمس اللي مالت للغروب ..
كل أحلامي بسيطة ..
زي نجماية بعيدة بس بتنور دروب ..
وتقولولي توب عن العشق اللي مالي دنيتك ..!
وبلاش تحب .. بلاش تدوب .. ؟!
فيه غناوي حزن سافرت في القلوب
فيه عيون الهم فيها ليل نهار ..
فيه وشوش فيها شحوب ..
إبدأ اكتب وانت طعم الطين في حلقك ..
عن مشاكل .. عن كوارث .. عن حروب ..
لأ يا سيدي ..
هي يعني ناقصة غلب وناقصة حفنة من الكروب ..
موقفي ده مش تراجع عن قضية ..
مش هروب ..
بس يعني المشرحة ناقصة قتيل ..؟!
ولا يعني الساحة عاوزة بطل من النوع التقيل .. ؟!
دوخيني يالمونة ..
دوخيني يالمونة ..
ياتري شالوا المعونة ..
ولا مش شالوا المعونة .. ؟
ياتري طوبة السنة دي غيروه خَلُّوه بؤونة .. ؟
ياتري سعر الحديد بقا أد إيه .. ؟
وردة بتغني وباسمع صوتها بيلف البلاد ..
ريحونا ..
ياللي غاويين تتعبونا ..
انا هأكتب عن هوي في عيون بهية ..
يستحي يظهر يبان والناس تشوفه ..
اللي بتشوفه السواقي والشراقي والنخيل ..
حب مليان بالنقاء ..
حب يهفو للبقاء ..
زي نسمة صيف جميلة جايه تحضن نبع ماء ..
مش مصايب ..
مش مجاعة ..
مش وباء ..
حب في فروع الكافور بيداري خوفه ..
كل حب وله ظروفه ..
مش ............. تقوم تغني
رجب ..
حوش صاحبك عني ..
اعتذر لقواعد الشعر العتيقة ..
لما جات هيفاء حصل ..
لخبطة في الوزن مني ..