[عادل صموئيل]

المشاركة الأصلية كتبت بواسطة عمرو الهندواى

استاذ عادل ليه سؤال وطلب

الطلب هو انى عاوز اسمع من حضرتك زهرة المدائن لفيروز
هذا اللحن الحماسى الجميل وخد وقتك تماما انا عارف الطلبات
المتجددة عليك يوميا والله يكون فى عونك

السؤال هو انى ساعات احس انه ام كلثوم كانت بتغير لما تعيد غناء اغنية
اكثر من مرة يعنى مثلاا عودت عينى من مقام كرد الرى لكن ساعات
لما اسمعها احس انها بتغنها المرة دى من مقام كرد وهو مقام الاغنية طبعا بس
المرة دى من درجة الدو مثلاا
فالكلام دى حقيقى ولا انا بيتهيالى وهل كان حليم بيعمل كدة برضو
انه يغير وينوع فى اللحن المعاد ويغنيه من درجة تانية من نفس المقام الاصلى
طبعا انا فاهم حتى لو فى تغير فى الدرجة فانها لازم ما يكون فى اى خلل فى اللحن
شكرا و كل الخير

اخى العزيز عمرو
اشكرك واوعدك افكر فى عزف زهرة المدائن لفيروز بس المشكلة فى الاغنية دى بالذات هى الإخراج يعنى انت عارف التوزيع الشديد اللى فيها والردود المفتجئة يعنى انا عشان اعزفها بمفردى وتطلع زى ما احب لازم انا اعمل لها اخراج وترتيب بحيث تطلع حلوة بالكمنجة لوحدها وده طبعا مش صعب عليا لكن زى ماقلت بيحتاج شوية وقت عشام ارتبها مع نغسى
اما سؤالك بخصوص الطبقات الصوتية دى مستحيل تحصل مع العمالقة على الطبيعة لكن تحصل مع مطربى الدرجة التانية لما االواحد منهم صوته يتعب بمرور الوقت نضطر ننزل تون او اكتر بس ده طبعا بيعتبر إفلاس فنى من المطرب , ومعناه ان صوته راح يعنى والحالة الوحيدة اللى ممكن تحصل فيها مع حد من العمالقة انه لو اإنية مسجلها من 40 سنة مثلا انا طبعا لون صوته اتغير وممكن ينزلها تون عشان يطرب اكتر لكن اغنية مسجلها من شهرين مثلا وينزلها طبقة دى عمرها ماحصلت , اما لو انتى فعلا متاكد انك سمعت اغنية مثلا عودت عينى مرة من الرى ومرة من الدو دى تعليلها حاجة واحدة بس بيبقى العيب ده ناتج من نقل الشريط من جهاز تسجيل لآخر يعنى فيه ساعات عيب فى اجهزة التسجيل بيخلى سرعتها ابطا شعرة من التنية لو حطيت شريط على الجهازين تلاقى واحد منهم الاغنية تسمعها هنا من رى والجهاز التانى نفس الشريط تسمع الاغنية وكانها من دو لأن السرعة لو ابطأ شعرة التون بينزل ولعلمك دى نادراً ما تحصل فى الاذاعة او اجهزة المحترفين لأنها ظاهرة خطيرة لو تكررت فى نقل الاغانى ممكن الاغنية تنزل كذا تون وكمان نكهة صوت المطرب تحس ان صوته اتخن وراحت لماعية صوته وللعلم السرعة دى اسمها السيكل يعنى كل اجهزة التسجيل فى الاذاعة والاستوديوهات سرعتها واحدة يعنى فيه جهاز مخصوص بيحطوا شريط فى صفارة والصفارة دى نغمة لا مثلا والجهاز فيه مؤشر بيقيس النغمة دى ولازم يبقى على علامة معينة فى القراءة ولو حطوا الشريط ده على جهاز تانى ولقوا المؤشر اقل او ازيد من العلامة فيه فى جهاز التسجيل بوتشميتر او مفتاح ويمسكوا المفك ويزودوا او ينقصوا لحد ما ييجى المؤشر على العلامة انا شخصيا كان عندى الجهاز ده المهم ان فى الاذاعة الاف الاجهزة وقطاع هندسى ضخم للصيانة من اهم وظائفهم معايرة الاجهزة كلها بنفس السرعة اتمنى ان تكون العملية وصلت ولاحظ ان من اهم ما انا استفدته من زمن العمالقة اننا كنا ندخل الاستوديو مش نسجل بس لكن نفهم فى اى جهاز نشوفة ووظيفته ايه لأن ممكن خطأ او عيب فى الاجهزة يعمل لنا مصيبة فى الموسيقى والمهندس الفنى ما ياخدش باله إلا لما نقول له احنا لأنه مش بيفهم فى الموسيقى زينا وعبد الحليم ممكن يغير فى الللحن من ناحية واحدة يعنى يغير فى توزيع الآلات بس يعنى يعمل صولو اورج او جيتار مثلا وده مكانش موجود فى التسجيل القديم للأغنية