RimskyKorsakov
ريمسكي كورساكوف
1844 - 1908
تخرج في الأكاديمية البحرية في سانت بطرس برج و يرجع له الفضل في التعريف بهوية الموسيقى الروسية حيث قام ببناء معظم أعماله من وحي الموسيقي الشعبية الروسية
أغلب أعماله أوبرالية و قد أبدع في هذا اللون لما له من قدرة على التعامل مع العمل الدرامي
من أشهر أعماله ( الآلية ) و التي بناها من وحي ( ألف ليلة و ليلة )
المتتالية السيمفونية
Symphonic Suite
( أربعة حركات )
شهرزاد
Scherazade
حكى عم كورساكوف حواديت من ألف ليلة و ليلة و لكن ( آليا )
و طبعا العمل ده في ودان أغلبنا
و بالرغم إن المؤلف لم يتعرض للكتاب بالكامل إلا أن العمل أصبح
المصاحب الموسيقي الرئيسي لو اتحولت أي قصة من الكتاب إلى عمل درامي
أبطال و شخصيات العمل عبارة عن ( جمل موسيقية ) ثابتة بيقوم بتفعيل دورها
عن طريق حبكاته الموسيقية حسب المكتوب لها في ( نص العمل الروائي )
و بالطبع أهم شخصيتين في الكتاب همه
و
و طبعا عيزك تسمعهم الأول كويس جدا خالص قوي ( في المرفقات ) عشان ظهورهم حيكون كتير على مدار ( الحركات الأربعة ) للمتتالية
و لاحظ الطبقة الصوتية المختارة ليهم
شهريار : في مفتاح ( فا ) أغلب ظهوره و دي طبقة بتكون غليظه
و أغلب ظهوره عن طريق ( آلات نفخ نحاسية )
شهرزاد : في مفتاح ( صول ) و أوكتافات عالية و مش بس كده لا
خللى ديما ( الكمان ) هوه إللي يقولها إلا قليل
و بنفس الطريقة كل الشخصيات التانية في الحكايات حتى الأماكن
و طبعا حا يكتر دور ( الآلات المنفرده ) في الموضوع عشان التأثير يتم
الغريب في الموضوع
إنه ما كنش يقصد القصص بعينها لكن قصده الأساسي هوه الصراع بين شهريار و شهرزاد و تحديها و إصرارها بكل ما تملك من ( إغرائات حواء ) على تغيير مفهومه و طبعا النجاة من الموت و في الآخر بتكسب ( حواء ) كالعاده
يعني الحواديت مسرح لشرح الصراع موسيقيا
و ده إللي لازم تحسه من الصراع الموسيقي إللي قدر يحققه من خلال توظيف الشخصيتين
( شهريار و شهرزاد )
بكل براعة و تنقل ألحانهم بين مجموعات الأوركسترا ( وتريات – نحاسيات – خشبيات ) و إزاي قدر ينمي الجملتين في شكل صراع موسيقي فريد و في نفس الوقت ظهور شخصيات الحدوته إللي بتحكيها ناهيك طبعا عن هرمونياته الحديثه و توزيعه القدير و توظيفه الآلي المتفرد و الأهم الروح الشرقية إللي جه فيها كل العمل
يعني ببساطة صراع بين شهريار و شهرزاد جوه حواديت موسيقية
و أنا حاحط ودانك على أول الحركة الأولى و آخر الحركة الرابعة
و عيش انت الباقي مع خيالك
حتلاقي إن الراجل قصده كله
( كيدهن العظيم )
إزاى
الحركة الأولى
The Sea And Sinbad's Ship
ظهور غاضب لشهريار ( هكذا دائما ظهوره ) و بعدين ظهور شهرزاد بأول حدوته مع أصوات أمواج البحر ( هارب ) و إسترسال لحنها و كأنه بيحكي و حتى لو راح اللحن عشان يحكي القصة موضوع الحركة ( آلات خشبية ) بيكون ديما في خلفية ( لحن الشخصيتين ) بسرعة بيرجع لحنها أو لحنه و إللي مرات بيجي هادي عن طريق ( آلات منفرده ) و مرات غاضب ( مجموعة النحاسيات )
و كل الحركات الأربعة على هذا المنوال
غضب – حدوته – نقاش – هدوء
و طبعا ترتيبهم بيتغير في الظهور
و بتتجلى عبقرية الراجل في الحركة الرابعة و قفلتها إللي هيا بالطبع نهاية العمل
الحركة الرابعة
Festival At Baghdad
The Sea
The Shipwreck
خللي بالك ( مهرجان – بحر – سفينة مدشدشه )
و وسط كل ده منساش الشخصيتين و صراعهم
شهرزاد في قمة الزخارف على اللحن الأصلي في صورة سولوهات ( كمان ) غاية في الصعوبة و إستخدام ( دبل كورد 01:04 ) و الإسترسال في الصراع و إللي ديما خلفيته حواديت الحركة حتى ظهور شهريار في ( قمة غضبه 07:36 ) و قمة غلاظة الطبقة الصوتية لتباغته ستنا شهرزاد بهدوئها و تروح لأعلى طبقات آلة الكمان و إللي يلزم لها عازف ماهر جدا عشان تعلق آخر نغمه 10:40
بعدها يظهر لحن شهريار و لأول مره في قمة الهدوء متعانق مع نغمة شهرزاد المعلقة و كأن لحنه بيقول لجلاده
سيبها لبكره
يبقى حضرتك قدام موضوعين في موضوع واحد
صراع شهريار مع شهرزاد و خلفيته الحدوته موضوع الحركة
و يا ريت تخللي بالك من ألحان الشخصيتين و إزاي بيظهروا و طبيعة ظهورهم
-----------------
Rimsky Korsakov
Scherazade
Symphonic Suite Op.35
أوركسترا
Concertgebouw Amsterdam
قيادة
Kirill Kondrashin
سولويست كمان
Herman Krebbers
1
The Sea And Sinbad's Ship
2
The Story Of The Calender Prince
3
The Young Prince And The Young Princess
4
Festival At Baghdad - The Sea - The Shipwreck
جميع التراكات على جزئين
Bit Rate : 128 kbps
__________________
دَعْ عَنكَ تَعنيفي و ذقْ طعمَ الهوَى
فــإذا عَشِـقـتَ فبَـعـدَ ذلــكَ عَـنـِّـفِ