[عادل صموئيل]

عزيزى مروان
اشكرك على هذا العمل الذى اعتبره ممتاز وليسمح لى الكل ان اقول رأيى انا لا امتلك من الدنيا غير شوية خبرة وكتير من الصراحة وشوية فن على قدى لكن اذن وتذوق موسيقى افتخر بهما
هذا العمل فى اداءه وتنفيذه يعتبر العمل المثالى فى قسم المبدعون فى منتدى سماعى يعنى انا سمعت موسيقى عربية اصيلة بلا كهرباء , وكلمة العمل المثالى لأن المنتدى اصلا يعتمد على الطرب العربى الاصيل ويحرص ايضا ان تكون تلك السمة الجميلة هى صفته الاصلية او تميزه بين المنتديات .
انت اولا قدمت العمل بنكهته الاصلية ولم تدخل فيه اى شىء او إضافات يفسد تلك النكهة , وللعلم تلك ميزة والحمد لله تعلمتها من عشرة وثيقة لمدة 20 سنة مع العمالقة كان من اهم المواصفات عندهم فى كل لحن جديد ان يكون له نكهة متميزة بإستخدام فريد غير مسبوق لميزة فى آلة او عدد من الآلات تعطى تلك النكهة ودليل كلامى انك لو سمعت 35 لحن للسنباطى فى مقام البياتى لا تحس بالتشابه بينهم مع ان البياتى واحد , لكن الطباخ شاطر اوى وطبعا تجد تلك الميزة الفريدة فى الجميع عبد الوهاب وبليغ والموجى والطويل وكلهم .
نأتى لصوتك اهم شىء فى الغناء ان يكون الصوت مطرب يعنى ملم بالنغمات الموسيقية والتنقلات المقامية وان يكون رخيما عبارة عن حزمة ممتلئة من الاصوات فى صوت واحد وهى احلى ما كان فى مطربى الزمن الجميل والتى يفتقدها كل من يملؤن الشاشات اليوم تجد صوتهم بعد كل التزوير والمؤثرات الصوتية فتلة رفيعة من الخيط الاجوف .
انا وجدت صوتك مطرب جدا ولم آخذ عليه اى ملحوظة معناها انك ممتاز . بس نفسى اسألك سؤال سر بينى وبينك انت بتعمل الإيقاع ازاى ؟
انا كعادتى او طبيعتى انظر للصورة بزاوية لا انظر الى ماداخل الإطار الذى يمثل الكادر الملتقط او الصورة فى حد ذاتها ولكن احاول او ارى ما فى الكواليس او الخلفيات انا لفت نظرى فى اغنية ياحلو صبح ياحلو طل بنت بتغنى صوتها رائع ولها جاذبية فى غناها يعنى كانت من احلى ما فى الاغنية ( واعتقد انا قلت ان احلى ما فيها ان لهجتها حلوة يعنى متقمصة اللهجة المصرية الاصلية للحن ) لكن هنا فى هذا اللحن لفتت نظرى ايضاً انها مش بترد فقط لكن انها مطربة قديرة متمكنة يعنى ركزت عليها لقيتها بتعفق وتقول عربة جميلة وزاد شعورى بأنها مطربة متمكنة لما غنت المذهب تانى مرة حسيت بإبداع فى تانى مرة غير ابداع المرة الاولى ودى ما تفوتش عليا انا شخصياً لأنى من معاشرتى للمطربين العظام احس بالإنسان اللى ممكن يكون مطرب مرموق او متميز , وانا بسمع قريت كل الردود ولفت نظرى فى لحن ياحلو صبح انك قلت عملت كورال من العائلة والنهاردة انت قلت انها بنتك وثق الله اعطاك كنز
وانا ارجوك بإسم كل محبى الفن الجميل من اعضاء سماعى ارجوك اخى مروان ممكن تعمل لها غنوة حلوة وتسعدنا بيها هنا لأن خسارة تحرم الناس من الموهبة الجميلة دى وانا متأكد انها ممكن تكون نجمة فى سماعى يعنى يبقى لها جمهور , كما لفت نظرى عزف ابنك الجميل على الكمان طبعا ابن الوز عوام لشكرك من كل قلبى على هذا العمل الجميل وعلى فكرة التسجيل حلو جدا نقى 100 % مش عارف ليه حد قال انه مش حلو انا ياريت اسجل حلو زيك كده بس انا المشكلة اللى عندى او الكارثة مشكلة الضغط لأن اعمالى معظمها طويلة يعنى ساعة فى المتوسط ولو سبت نفسى اسجل براحتى حاتطلع 60 ميجا وطبعا انا من اكتر الحريصين على سيرفر المنتدى يعنى بضغطها ل 6 ميجا وانا نفسى اضغطها اكتر لكن الصوت بتقل جودته كتير
مع اطيب تحياتى ومنتظر