سيادة الرئيس ......
سـامعني ؟
أنا متهيألي إن فخامتك ماقصدتش (الفرح ده لابو النجوم) فخامتك - على ما أظن - كنت عايز تفكر الناس بعمي عبده الدمرداش ، صح؟
بس الليلة كلها بتمسي و تصبح على ابن المحظوظة أبو النجوم ،،، مش قلت لفخامتك زمـــــــــــان إنه مرزق؟
شوف فخامتك عمي عبده بيعمل إيه في التالي:
أول دخول الجنينة ، فـَتـَّح الياسمين
و الساسبان اشتكى ، و الورد قال : دا مين؟
فرحت عـُنيبة وقالت: إفتحوا الباب للعاشق المسكين
أنا قلت: ياست يا اللي على بابك قبول وسماح
ساعة اما ازورك ، ألاقي الهم عني راح
يا اخت الحسن و الحسين ، نظرة يا أهل البيت
حن الحديد لجل حالي و انت لم حنيت
والقرب و الغرب حنوا ، وانت لم حنيت
لو كنت تعلم بحالي ، كنت لي حنيت
وحياة مقام النبي والحرم والبيت
أبو مقام عنبري موقود من غير زيت
لتخلوا بالكم معايا ، إن رحت ولا جيت
أبوس أجلاسيهات فخامتك ، قولي : مين يقدر يخلي باله في اللفة اللي فاتت دي؟
مش هو عمي عبده الدمرداش اللي قال:
ياجاهل الفن ياغشيم، دا انا وطني وعندي حماس
و اقول القول بترتيب و عندي حماس
واسأل عمامك ، تلاقي الكل خاضعلّي
وليا بدايات في كل مكان خاضعلّي
دا انا سبع كاسر ، وتلقى الكل خاضعلّي
و اغير عالفن من صغري وعندي حماس
يوجد كلام عن عمي عبده الدمرداش هنا
بس برضه بعد إذن فخامتك(و أجلاسيه سيدي علي فوق راسي)
ماينفعش تبقى الليلة كلها أبو النجوم ، وانا اخرج عن الصف
وعلشان كدة اللي جاية دي آخر قصيدة كتبهاعمنا أبو النجوم من أسبوعين وبعتهالي الصديق الرائع الأستاذ بسام الهلسة (كاتب فلسطيني مهاجر)
نؤيد سيادتك
نؤيد سيادتك لفترة جديدة
نكمل خلالها المسيرة السعيدة
و بالمرة فيها نبيع الحديدة
مفيش حاجة تانية نبيعها خلاص
*****
نؤيد سيادتك لأجل المزيد
من اللي تحقق بفضلك أكيد
بقينا خلاص ع الحميد المجيد
و ربك لوحده ف ايده الخلاص
*****
نبايع سيادته ولا حد غيره
كفايا علينا نبرطع في خيره
و نوم شعب مصر العظيمة و شخيره
يقول للحرامي ما تسرق كمان
*****
نبايع سيادته وابنه وحفيده
مفيش زي فكره قديمه و جديده
خرابك يا مالطة حيحصل بايده
ومين فيكي يعني بيسمع آذان
*****
نبوس إيد سيادتك و رجلك كمان
تخليك معانا يا ريس عشان
وجودك ضرورة فرضها الزمان
و من غير وجودك حقيقي نضيع
*****
دي مصر بتاعتك و احنا ضيوفك
كفايا علينا يا ريس نشوفك
و عاذرين سيادتك و فاهمين ظروفك
عليك بس تؤمر و احنا نطيع
*****
في جزمة سيادتك كلابك يبوسوا
و فوق الغلابة بجزمهم يدوسوا
و شعبك ليلاتي يا ريس غموسه
مذلة و مهانة و حوجة و مر
*****
لكن يعني ما دمنا شعب انتساب
و دايما وأبدا ف حالة غياب
متعملش لينا يا ريس حساب
دي عزبة سيادتك و فيها انت حر
*****
و دستور مدستورش مش فارقة خالص
كلام فاضي كله يا فندم بناقص
كفايا علينا الفساد اللي ماصص
عرقنا و معشش و ضارب جذوره
*****
و ايه يعني تهري جتتنا البلاوي
يوماتي كوارث فضايح رشاوي
كفايا علينا القعاد في القهاوي
بنستنى لما الوريث ييجي دوره
سيادة الرئيس " أبو علي" الغالي ،
عمي عبده مرة قال:
من حبّ إنسان ، جاله عالقدم ماشي
جميل وقال لي: يعجبني طولي جنبك و انا ماشي
بس انا اجيلك ازاي ماشي ؟ وفيه في السكة محيط و بحرين (الأبيض و الأحمر) ....
ما بعرفش اعوم ........ ياخسارة