[محمد المراغى]

بدل ما نبكى بنغنى

أنا اللى بكتب الاشعار .....
والا الأشعار ...... بتكتبنى
أنا اللى بشكى م الاحزان
والا الأحزان .... شكت منى
أنا اللى بشدى بالكلمات نغم صافى
ونفس اللحن ....... يقتلنى
وحتى الدمع لما طال
صبح عاده على خدى .... تلازمنى
بتضحك ليه ..؟ !!
وتتبسم .. ؟!!!
ياصاحبى ليه كتير ديما بتسألنى
أنا بضحك على الأيام
على بكره اللى جاى لينا وبيمنى
وألف جرح مدارى .. شايلنها
ورا الاحلام
يمد الجرح ..... ويهنى
ويسقينا مراره فى كاس
ويسكرنا
بدل ما نبكى .... بنغنى
أدى الدنيا
يا صاحبى بلاش
كتير عنها تيجى تسأل .... وتتعبنى