لو كنت اكون
يا سلام لو كنت اكون ..
نغمــة حلــوة تـرن و الدنيـــا سكــون
و الا نسمة تصاحب الطيـر و الورود
و الا ورقـــــة في كتاب من ألف باب
و الا دمعة عين تريّح
قلب مخنوق م العذاب
و الا اكون حتة قماش !
يعملوني حتى منديل و الا شاش
أمسح الدمع الحزيـــن ..
و اضم جرح المجروحين
شمعة قايدة في عيد ميلاد
عطر طاير في الهوا لكل البلاد
نقطة في ضرع السحاب
سِبحة في إدين اللي تاب
حاجة حلوة .. بس اكون !
**
يا سلام لو كنت اكون ..
كلمـة حــق لما ابوح
شمس تانية لو تروح
الحقيقــة عن عيــون النـــاظرين
و البراءة لو تضيع م المظلومين
رصاصة في وجــه الفســــــــاد
كل ظالم ، كل طاغي في البلاد
و العدا ، و المعتدين
سيـــف يحطـَّــم كـل قيـــد
فرحــة ساكنة فـ كل بيــت
ورقــة في غصـن الزتـون
ضحكة في عينين اللي عاد
بعد غـــربة ، للبلاد
حاجة تِفرح .. بس اكون
و يا سلام لو كنت اكون !
أيوة تقدر انت تكون
انت انت تقدر تكون
لأ دا انت لازم تكون
كن إنسان و انت تكون !