[حسن كشك]

اغنية من العيار الثقيل
عزومه من اللى بيتشرب فيها قهوة سادة .... اغنية مش عارف اوصفها .... لكنها جميله ورائعة كلمات ولحن وغناء
لكن طابعها حزين جداً ... مندبه ... لكن راقية جدا ... ولكن لما تستمع للاغنية ... لا تعرف .أأنت تقولها ... ام أنت تسمعها .... يعنى انت الظالم ولا المظلوم ... ( ما اهو احنا كده لما بنسمع اغنية بنعيش الحاله )
لكن بصراحة ياجماعة انا مش عارف ... الراجل اللى لحنها ده ... لحنها ازاى والله .... مش ممكن ... لحن جميل رائع وحزين ... الا فى بعض الاوقات ... كان بيحاول يهرب من الحزن ده ... ويفرح شويه ... لكن ... كلام الاغنية ما بيخلهوش يطول فى الفرح ...والفرصه الوحيده اللى لقاها الملحن عشان يعمل شويه فرح فى الشطره دى ( وحتى انت بقيت اقابلك واخلى دموعى تضحكلك )ماصدق شاف كلمة (تضحكلك) بس ياعينى يرجع لحالة الحزن الوقوره اللى بتجبرنا على احترامها تانى وحتى الكورس فى الاغنية مقالش غير كلمه واحده واخذ يرددها ( آه ) بس والموسيقى كانت اشبه بالموسيقى التصويرية للافلام وخاصة المقدمة الموسيقية للاغنية .. ولما كانت نجاة تغنى كانت الموسيقى تتوقف تماما .. عدا اله الايقاع واظنها الرق ...وتابعوا الرق فى الاغنية هو والايقاع وشوفوا بيعملوا ايه وخاصة فى المقدمة اللى قبل الشطره اللى بتقول ( انا الدنيا اللى من غيرى مكانش الكاس بيحلالك )واثناء غناء نجاة لهذا المقطع جمال مابعده جمال ... وسلطنه ورقى والنبى تاخدوا بالكم وتركزوا اوى اوى .
موضوع الاغنية ببساطة حبيبه تلوم حبيبها ... على نسيانه جمايلها عليه ... هى جمايل عاطفيه ....وتضحياتها عشانه...وتستغرب ... لما هى عملت ده كله معاه ... هجرها وسابها ليه ....احكموا انتم ...
رابط الاغنية

الاغنية .... انا املك
الكلمات ......؟؟
اللحن .......؟؟.
الغناء : نجاة الصغيره .... لما كانت صغيره وصوتها الحزين المميز الخفيض وغنت الاغنية بسلطنه عالية ونفس مرتاح اوى اوى

كلمات الاغنية
والابيات اللى تحتها خط رائعة وبتوجع القلب اوى
أنا املك... انا حبك ... انا الفكر اللى مشغول بك
انا القلب اللى من عهدك ... مالوش قبلك ولا بعدك
وبعد ده كله تنسانى ... وتنسى قلبى .... يا قلبك

انا النار اللى كان قلبك ... ...عايش فى نورها متهنى
شبابى كان حطب نارى ... ... لا نابك انت ولا نابنى
رضيت بالنار عشان خاطرك ... عشان تفضل تنورلك
وبعد ده كله تنسانى .............وتنسى نارى ياقلبك

انا الدمع اللى كان يسهر..... ليالى من الاسى يشكى
وكان لو حد يسألنى .........اقول من فرحتى بابكى
وحتى انت بقيت اقابلك .....واخلى دموعى تضحكلك
وبعد ده كله تنسانى ...........وتنسى دموعى ياقلبك

انا الدنيا اللى من غيرى ... مكانش الكاس بيحلالك
ولما الوجد راح منك ..... بقيت من روحى املالك
لا يوم حاولت اغيب عنك ....ولا فكرت اروح منك
وبعد ده كله تنسانى ........... وتنسى قلبى ياقلبك

اسمعوا لهذه الرائعة المنسية وتمتعوا
فينك يامايسترو ... خش ياخويا وحلل ... ولا خلاص ماعنتش بتحلل اليومين دول ونفسك كبرت علينا.. اللى عطاك يعطينا ياعم