جمال الدنيا يحلالى وانا وياك
أحمد رامي
زكريا أحمد
من فيلم فاطمة
**********
جمال الدنيا يحلا * يحلالى وانا وياك
وساعة القرب تهنا * تهنالى مادمت معاك
**********
يا محلا الفسحة فى المينا * وموج البحر حوالينا
يميل بينا على الهينا * يهنيني وانا وياك
دي ساعة القرب تهنالي * ما دمت معاك
**********
هويت الحسن طول عمري * وطيفه كان نديم فكري
يا ريتني كنت من بدري * رأيت الحسن ده وياك
دي ساعة القرب تهنالي * ما دمت معاك
**********
تعجبني الدنيا دي وحدي * وحبيتها على قدي
لكن مقدارها زاد عندي * وحليتلي وانا وياك
دي ساعة القرب تهنالي * ما دمت معاك
**********
يا ريت كل اللي هناني * من الدنيا ومناني
تشوفه عيني من تاني * يا نور العين وانا وياك
دي ساعة القرب تهنالي * ما دمت معاك
**********
نعيم قربك سحر عقلي * وخلا البحر يضحك لي
وخلا الطير بيندهلي * يهنيني وانا وياك
دي ساعة القرب تهنالي * ما دمت معاك
**********
**********
**********
الورد جميل (لغة الزهور)
بيرم التونسي
زكريا أحمد
من فيلم فاطمة
**********
الورد جميل .. جمـيل الورد
الورد جمــيل ولـه أوراق * عليــها دليل من الأشـواق
إذا أهداه حبـيب لحبــيب * يكون معناه وصـاله قريب
شــوف الزهور واتـعلم * بـين الحبــايب تــتكلم
شوف .. شـوف .. شوف * شوف الزهور شوف واتعلم
**********
والنرجس مال يمين وشـمال * على الأغصان في تيه ودلال
عيونه تقول معانا عــزول * خليــنا بعيــد عن العزال
شــوف الزهور واتـعلم * بـين الحبــايب تــتكلم
شوف .. شـوف .. شوف * شوف الزهور شوف واتعلم
**********
يا فل يا روح يا روح الروح * من شم هواك عمره ما ينساك
لكل حبيب تقول في لغـاك * حبيب مشتاق .. بيـستناك
شــوف الزهور واتـعلم * بـين الحبــايب تــتكلم
شوف .. شـوف .. شوف * شوف الزهور شوف واتعلم
**********
شوفوا الياسمين جميل نعسان * حلي له النوم على الأغصان
بكل حنـان تضـمه الإيـد * وبُـه تزدان صـدور الغيد
شــوف الزهور واتـعلم * بـين الحبــايب تــتكلم
شوف .. شـوف .. شوف * شوف الزهور شوف واتعلم
**********
**********
**********
نصرة قوية
بيرم التونسي
زكريا أحمد
من فيلم فاطمة
**********
نصرة قوية وفرحة هنية * وألف سلامه وألف سلام
**********
نصرة قويه يديمه عليّ * وعلى أحبابي اللي حواليه
هما هنايا وضي عنيه * اللي صفولي مع الأيام
ألف سلامه وألف سلام
**********
فرحة هنية المولى نصرنا * فوق الكل جزاة ما صبرنا
أحبابنا فرحت وفرحنا * فرح ما كان يخطر في منام
ألف سلامه وألف سلام
**********
ألف سلامة رحنا وجينا * ربنا سابل ستره علينا
واللي يكون المولى نصيره * عمره ما يِغْلَب ولا ينضام
ألف سلامه وألف سلام
**********
**********
**********