قابـِلنِي عندِ المُنـْعَطـَف
قلبي ، اللي كان خامِل ، رَجـَفْ
وقالـِّي ،عـَنـُّه ، كلام كتير
على غير عاداته ، ما انـْكـَسَفْ
حـَوِّدْ بـِعـُمْري وردِّنِي
لوقت التساؤل والشَّغـَفْ
ما اعرفش إيه فيه والنبى.....
زايد وإيه فيه مُختلفْ
غير إنه لما عدَّى ، كان
قلبي ف إديَّا و انخطف
بعتر كياني من سُبَات
ولا حس بـِيَّا ولا لـَطـَف
قلبي اللي عمره لم يبوح
صابه الوضوح ، باح لي وكشف
ورحلت لبلاد الغرام
سارح بأعضايا التلف
أدخل حانات الذكريات
أرفع كاساتها وأرتِشف
ومتاحف "الوقت اللي فات"
أنفض غـُبارُه عن التـُحـَف
أجمع في مكسورها القديم
واداري حـَرفـُه اللي انشطـَف
واشوف صور بلـُون عـَدِيم
مابين رطوبه وبين نشف
فيها اللي قاعد منتشي
فيها اللي مجهول واتعرف
فيها اللي حاول يبتسم
وعنيه بتنضَح بالقرَف
قلبي اللي "طـَار" كإنه ريـح
راجع كسيح ، ريشه اتنتف
__________________
أستغفِرُ الله العظيم وهو التوّاب الرحيم