هـَقـُولـِّكْ إيه و اعيدلك إيه؟
وهنزوَّق كلامنا ليه؟
لا نِتـْفـَلـِسِفْ و لا نـْفـَكـَّر
دِي هيَّ كلمة مُشْ أكتر:
وحشتيني يا بنت الإيه!
ووحشة قلبي ، من بُعْدِك: وحشتيني
ولا قبلك و لا بَعْدِك سَلـَبْ عيني
و لا قلبي اللي أحواله "مجانيني" !
بقى ينطق سوى كلمة: وحشتيني
يا قلبي عليه
وحشتيني يا بنت الإيه!
أقولك؟ ، صَدَّقِي ، مَرَّة !
أنا ماكدبت غير مرَّة
في يوم ما الدنيا شافتها
بعيني ، وكنتْ ناسيني
ومش عارف ناسيني ليه
وحشتيني يا بنت الإيه!
وحشني قلبك الحَانِي
و أعيَّانِي غياب صوتك
يا ريحة سِحْر أوطانِي
وقلبي عتبة لبيوتك
إذا يفوتك
يسِيبْنِي و يحضُنِك تاني
و تِقـْسِي عليه
وحشتيني يابنت الإيه!
وحشتيني ماهِيشْ كِلـْمَة
هتوزن بالحروف قلبي
و لـَوْ جـَتْ بالحروف لـَمـَّة
و كل كـُتـَبهَا مع كـُتبي
هيعجـَز وَصْفْ أشْجَانِي
و انا مْخـَبـِّيهْ
وحشتيني يابنت الإيه!
__________________
أستغفِرُ الله العظيم وهو التوّاب الرحيم