[عادل صموئيل]

المشاركة الأصلية كتبت بواسطة jackie84

شكراً سيدى

* لاحظت أنك دائماً تكرر مدرس يختار لك الأله الموسيقيه .. هل تعلم يا سيدى أن أى معهد موسيقى يطلب منك تحديد ألاله التى تريد لعبها ( هذا يكون من أختيارى) .. ومن الصعب الواحد مننا تحديد الاله المراد لعبها من نفسه على سبيل المثال أنا أعشق كل الألات الموسيقيه وخصوصاً الوتريات لبكل أنوعها .. لكن للأسف الواحد مننا يحدد أختيار الاله على حسب ما يمتلك على سبيل المثال أنا أمتلك أرج فبالتالى أتعلم ارج , شخص أخر لديه جيتار فيتعلم الجيتار .. للأسف لم أجد مكان يحدد قدراتك الموسيقيه ويرى الاله المناسبه لك ؟ ( أريد التعليق)

* أنا لست من سكان القاهره أنا من سكان الاسكندريه

* ما رأى سيادتك فى الدرسات الحره فى كلية التربيه الموسيقيه فى الزمالك ؟ هل هى مفيده ؟ وللمبتدئين فى علم الموسيقى تحديداً ؟

* كان أخى أخذ دروس لمدة شهر فى معهد الكنزتفوار فى ألارج وعندما سأل المدرس أنه يريد التلحين قال له ( دروس العزف نقره ودروس التلحين نقره أخرى) ؟ ما رأى حضرتك فى هذا وخصوصاٌ أن أخى لم يتقدم شئ فى العزف ومن المضحك أنى أعزف أحسن منه بكثير رغم أننى لم أخذ دروس

* اعانى من مشكله وهى ( عرق المفرط فى كلتا يداى ) وكنت أخشى أن هذا يكون عائق فى تعلم الالات الوتريه , ما رأى حضرتك ؟

اخى العزيز
اولا اشكرك على التواصل المستمر وانا لو لاحظت انى اتامل فى اعماق الامور ولا آخذها كما هى واحب ان اعلق تعليق بناء على كل خواطرك او اسئلتك
عايز اتكلم معاك فى المشكلة السهلة حكاية العرق الغزير فى اليدين اول حاجة انا كرجل متعلم اقول لك ممكن استشارة طبيب لأن دى مشكلة يمكن ماتعطلكش فى الاورج لكن تعطلك فى الآلات الوترية واقول لك على سر محمد قنديل كان عنده نفس المشكلة بس ماتناقشتش معاه فيها
دايما اى احتياج للإنسان بيحتاج مثابرة طالما كان الاحتياج ده مش نزوة فورية وتروح , وكلمة نزوة معناها واحد يطلع فى مخه يتعلم موسيقى وانت عارف الموسيقى صعبة مش سهلة ولما ما يلاقيش نتيجة فورية يزهق ويغير رأيه , لكن طالما هى مش نزوة بتحتاج شوية مجهود او طرق جميع الابواب الممكنة وعدم الاستسلام للفشل , انا بكلمك من تجاربى فى الحياة وخبرتى يعنى انا مثلا 3 شباب زمان طلبوا منى اعلمهم كمنجة طلبت منهم يجيبوا كمنجة ورحت لهم بيتهم من غير ما اطلب منهم فلوس بعد فترة ظهرت موهبة فى واحد منهم والاتنين التانيين ماتقدموش واللى ظهرت موهبته ده غير حياتة وبقى موسيقى ناجح جدا, تفهم من كده ايه ؟ ان فيه واحد عنده قبول سريع لتعلم الموسيقى وواحد لأ , وقصة اخوك ممكن يكون ماعندوش الموهبة انه يتعلم عشان كده ما استفادش حاجة رغم وجود الامكانيات
انا نفسى اسألك انتى طالب ولا بتشتغل يعنى لو كنت بتدرس بتدرس ايه؟ انت لو فى كلية نظرية ممكن تتعلم بالمراسة او من الخارج يعنى تجيب الكتب وتذاكر ثم تمتحن لكن لو كلية نظرية لازم طبعا الدراسة العملية مع اساتذة طبعا فاهم قصدى ! وانا اكرر موضوع المدرس لأن من المستحيل انك تحاول تتعلم لوحدك لأن تخيل انى حديك حصة ( ومع الاسف ظروفى ماتسمحش ) بقول تخيل اولا حاشرح لك جزئية صغيرة وتبتدى تطبقها الملحوظ انك حاتغلط 100 مرة وانا اصلح لك الخطأ , يعنى بأختصار حا تغلط ونصلح ااالاخطاء لكن لو لوحدك حاتغلط بس طبعا فاهم الفرق
وكل مرة اديك معلومات وبالتدريج الاخطاء حاتقل وتبتدى تظهر نتائج كويسة صح؟ واهم شىء فى الموسيقى انك حتى مع وجود المدرس تبتدى تجرب اكتر مع نفسك يعنى كمان اجتهادك الشخصى عليه نسبة 50% من نجاحك انا اقترح انك طالما عندك اورج ابدأ اتعلم الاورج بس برضه مع مدرس , يعنى ركز اهتمامك تعلم الاورج فى الاول بعدها ممكن سهل بداية التعليم على لآلة وترية لأن حايبقى عندك خلفية كويسة , انت قلت انك ساكن فى الاسكندرية واكيد فيها معهد خاص لتدريس الموسيقى لأن كلية التربية الموسيقية بعيدة عليك للإستمرار والانتظام . والدرسات الحرة طبعا كويسة يعنى احسن من بلاش , واخوك زى ماقلت ممكن يكون ماعندوش الموهبة اللى تخليه يستفيد بسرعة ,
فيه حاجة تانية انت قلت عن التلحين مافيش حاجة اسمها دروس فى التلحين التلحين ده موهبة فطرية بس انا ممكن احسها فيك بعد ماتتعلم اجادة لآلة معينة وتعمل لحن وتسمعهولى على الآلة وهنا مهارتك فى العزف هى اللى بتبين حلاوة اللحن , بمعنى ممكن الجملة تكون حلوة جدا وعزفك مش حلو حاتضيع طبعا حلاوة الجملة فاهم قصدى ؟
ولما تتعلم العزف وتلحن الجملة انا هنا كخبير اديك ملحوظاتى على تلحينك لكن مش درس تكون ارشادات بس
لأن التحين ده اصلا خلق منك انت من موهبتك ومشاعرك وابداعك ماحدش ممكن يعلمك تلحن ازاى انتى بتلحن واحنا نرشدك للأحسن
انا آسف للإطالة عليك ولكن كلامى اعتقد ان فيه درس يفيدك ويفيد الاخوة اللى فى نفس ظروفك واظن انك لاحظت انى عايز اساعدك وعايزك ترد على وتعلق على كلامى ونفكر سوا ايه احسن طريقة تفيدك لأنى احب انك تستفيد منى ومن كل الزملاء اللى عندهم خبرة تفيدك وكلمة مهمة : ممكن مدرس يديك كمية بس المهم انت تستفيد من الكمية دى اد ايه