[حسن كشك]

كلفنى الصديق محمود العيادى بكتابة الاتى :
الاخوة الاحباء الاعزاء صحبة سماعى
ليلة امبارح ماجانيش نوم
ليه ؟
من فيض السعادة واللحظات الجميلة الظريفة اللذيذة الشهية الفسفورية السى فودية القدورية .
فى البداية اتقدم بخالص الشكر والعرفان للزميل العزيز والاخ الشقيق حسن كشك لانه اتاح لى التعرف باسرة سماعى ولو انى مش ( نتاوى ) لكن بالانتساب انا منهم من يوم لقاء ( اللورد ) المحترم محمد عمر سعدت باللقاء مع احبة فضلاء ( جمع فاضل ) حتى لايفهم المقصود غلط ، ثم اسعدنى الحظ وتعرفت على زميل مهنى قديم هو الاخ محمد الالاتى وهو شخصية اكثر من ظريفة لطيفة وابن مهنة محترم ابا عن جد وبعدين ايه الشياكة واللطافة اللى عند انسان مهذب اسمه الدكتور حسن حافظ والشخصية الحلوه دى المندور ( محمد ابو مندور ) غندور السماعى وعم السيد المشاعلى والولد الشقى غازى وصاحب فيض الكرم اللورد محمد عمر وللاسف لم يسعدنى الحظ بلقاء الاسكندرية ( ظروف عمل ) وباقية باذن الله .
وحضرت الى لقاء زهرة البستان وعلى عجالة تم ترحيل الاجتماع الى قدورة وقابلت حته شخصية - ايه الهرم الجميل ده - اقصد هرم قامة وقيمة واسمه ( د. انس البن ) .
ايه ياعم حسن انا كنت فين من الناس دى ؟
ولا المهندس عادل السيد الشهير باسم ( عادل الطائى ) ايه الواجب الكبير ده كله وايضا باقى باقة الاصدقاء الحضور :
أ. سامح الاسوانى - شاب جميل وهادئ ومؤثر فى اللى قدامه وبرضه الالاتى فى الليلة دى صمم يقعد جنبى ( مع انه دباغ فى الاكل ) الله يعينه وشرفت بمعرفة السادة : احمد عبد الهادى مستمع جيد وعنده حصيلة معلومات فنية كبيره جدا وانا اتناقشت معه فى موضوع تلاوة القرآن ومدى ارتباط القراء بالمقامات الموسيقية واشترك فى المناقشة د. انس البن - م. محمد على - ابورشا والانسة الجميلة رشا وابو يوسف ( صلاح علام ) اللى عرفت انه موسيقى بعد اللقاء - ازاى ما اتكلمناش مع بعض ؟ والفنان عمرو التحفجى ( جرامافون ) .
الحقيقة انا ممنون من الاخ حسن كشك اللى عرفنى بيكم ياجماعة الخير واتمنى من الله ان يديم اللقاءات معكم يا احبه
والى لقاء
اخوكم
محمود العيادى