[عادل صموئيل]

عزيزى الاستاذ محمد الآلاتى
تحياتى اليك واشكرك على الرد
المشكلة انى بعد ماعاشرت السنباطى وعبد الوهاب وكلهم عشرين سنة اكيد اكون شربتهم او اتعديت منهم هم مدارسهم كانت السلطنة والطرب يعنى الواحد منهم بيعمل جملة مبدعة وعشان هو نفسه يستطعم ابداعه وبالتالى يشبع مستمعيه كان بيقول الجملة عشرين مرة والشىء الخارق انه كان كل مرة بيقول الجملة بيضيف اليها ابداع ولو قالها عشرين مرة كل مرة بيكون فيها لمسة ابداع جديدة حتى لو حرف واحد اما لو زود عن عشرين مرة بيسموا الجملة سخنت فى ايده زى العربية ما تتسخن حلو وتطير معاك او يقولوا الجملة ابتدت تلين معاها وهى نفسها تبتدى تقول له اكشف الابداعات اللى فيها
ولعلمك ان فى الول كانت مشكلتى هنا فى المنتدى ده هو ضغط الملفات عشان ما الخبطش سياسة المنتدى ولكن توصلت لطرق ضغط بحيث ان الملفات تبقى اصغر ما يمكن فى الحجم مع الاحتفاظ بكل ماعزفت
انا عندى برنامج ممكن اختصر عزفى لربع الوقت لكن الابداع حايروح وايضا فيه عندى مشكلة انا متخصص اكتر فى الاغانى الصعبة الطويلة بس برضه ساعات تستهوينى اغنية جميلة صغيرة
بس اتمنى ما اكونش طولت عليكم فى العزف لأن الاغانى دى فعلا لازم تتسمع سمع مشبع يعنى ام كلثوم نفسها كان الجمهور ما بيحسش انه شبع إلا لو سمع الكوبليه الواحد اربع مرات
فيه مشكلة تانية انا اعتبرها خطيرة فنيا ولعدم اهدار حقوق الاساتذة الكبار اللى انا لحم كتافى من خيرهم
لو درست الحان عبد الوهاب مثلا تلاقى معظم الحان ام كلثوم بيعمل لها لازمة تخليها تعيد الكوبليه منه فيه والاومة دى عادة بتكون جملة جميلة جدا عالية القيمة فى الاذاعة فيه تسجيلات كاملة وتسجيلات مختصرة تلاقيهم فى المختصرة بيشيلوا الازمة دى مع اعادة الكوبليه ويخرجوا من الكوبليه على طول ودى خسارة لأنه بيخلى الناس تنسى الجمل الجميلة دى لكن انا بحافظ بالذات على كل حرف عمله الملحن
فيه برنامج فى الاذاعة اسمه عصر من الغناء انا مش بحب اسمعه بالذات لأنه بيختصر الاغانى وبيشيل اللزمات اللى بقول عليها لما بيختصر زمن الاغانى ودى اعتبرها خسارة فادحة اتمنى ان يكون مضمون كلامى وصلك والف شكر