[M O H A M E D]

قصاقيص ورق ...

قصاقيص ورق

منين أجيب مقص مجنون زيي ، بس نص نص

و اجيب ورق و افضل أقص أقص أقص

أفضل أقصقص ورد من على كل لون

لحد ما اعمل عندي حبة كتير كتير ،

و اركب لي نسمة ، و اطير اطير ،

و احفن و ادردب ع البلاد ، مطر غزير

ينزل يرخ يرخ ، على قرعة بنات أخت البشر

يتسبسبوا ، و يتشيّكوا ،

و يبقوا لابسين - لا مؤاخذة - طراطير .

و يا سلام ..

لو كان كمان معايا وقتيها قلم كوبيا ، طويل

طويل ، طويل ،

أبلـّه من قلبي ، اللي عرقان مـ السفر

و اكتب به و انا طاير ، على خد القمر ..

أنا بحبك يا جميل

قصاقيص ورق

لكن مطر

يرخ ، جامد ، قد ما يحبوا الولاد ،

يادوب كده ،

مقدار ما يجروا ، و يمسكوا

مطر ! .. خطر ! ..

ينزل على اكتاف العجايز ! .. يضحكوا

يشبك في سلك التلفون

هنا ، و هنا ، و هنا ، و هنا ،

على كل لون ،

و اللي في جنازته في التابوت ، يفوت ، يبص ..

يلاقي عالَم ، كله كله كله زينة عيد ميلاد ،

و يبقى فصل ، لكين مفيش بالشكل ده !

لابد من عيد الميلاد

أنا عيد ميلادي مالوش معاد ،

فين الورق ، و النسمة ، و المقص ، و القلم يا واد ..

و الا بلاش ، ده مفيش أمل !

أعياد كتير بيبتدوا ، و بيفرغوا ،

و بيفضل العالم كده ،

مكبوس و دمه تقيل تقيل ...

يا ربنا ،

يا اللي خلقت لنا الأيادي للهزار ، و للعمل ..

ادّيني قوة ألف مليون إيد ،

عشان

أزغزغه !