[M O H A M E D]

السلام عليكم يا شيخنا الجليل
و السلام لكل الأحبة اللي أمتعونا بهذا الحوار الراقي

مش عارف الواحد يقول ايه بعد كلامكم !

* أم كلثوم *

من صغري و انا بسمع آهاتها و مقاطع من أغانيها
و كنت لما اسمع ( هل رأى الحب سكارى ) و ألاقى اندماج من اللي بيسمعوا المقطع ده ..
أقول هو فى ايه ؟ و لا هو يعنى ايه ( هرأى الحبو سكارا ) _ كنت بسمعها كده !!

لكن أول مرة كنت اسمع أم كلثوم - برغبتى - كان عندي ييجي 14 سنة
و الأغنية كانت ( انت عمري )
شريط بتاع والدي و كاتب عليه بخطه إيده تاريخ تسجيل الأغنية
و بصراحة انجذبت لهذا الصوت و عجبتنى موسيقى عبد الوهاب اللى كنت بعشق له موسيقى النهر الخالد

فضلت أدور على أغانى تانية ليها و اشتري ألبوماتها .. و كنت بنتظر مواعيد إذاعة أغانيها فى الإذاعة ،

حبيت حب ايه و اسأل روحك و الحب كده و سيرة الحب و ألف ليلة و ليلة
و كنت بستوعب الموسيقى بسهولة ، لحد ما سمعت ( غلبت أصالح ) !!
الأغنية دي ما هضمتهاش من أول مرة .. لكن التكرار بيـ إيه ؟ بيعلم الشطار

و استمريت فى سماع أغانيها لحد ما سمعت الأطلال .. و بقيت متيم بالغنوة دي
و فهمت ايه السر في ( هل رأى الحب سكارى ) و ازاى أم كلثوم بتبدع فى الإعادة

الخلاصة إن أم كلثوم حالة متفردة فى الغناء الشرقي و اللى ما سمعهاش هيفوته كتيـــــــــر

و التكرار اللى هي بتعمله ، ده لإن عندها اللى ممكن تقوله
و مش أى مطرب يقدر يبدع زيها كده فى التكرار .. لإن فاقد الشئ لا يعطيه
و بالنسبة لأغاني الحب و غنائها في سن متقدم ، دي نقط مهمة للنقد لكنها مش سبب لإن الشباب ما يسمعهاش

ممكن تكون الأسباب مختلفة في عدم حب البعض لأم كلثوم لكن أخطر سبب في رأيي
هو أن تفرض أم كلثوم على واحد بالعافية و تقول له اسمعها ..
دي كوكب الشرق .. دي فنانة الشعب .. دي مفيش زيها
ساعتها هيكره أم كلثوم و سيرتها على سيرة الحب

لذلك أنا بحيي الأستاذ إيهاب على أسلوبه الذكي ،


*في شئ لاحظته .. أم كلثوم إما أنك تحبها جداً لدرجة الجنون .. أو إنك ما تحبهاش خالص
تقريباً مفيش فى حب أم كلثوم وسَط !

شكراً لكم
و لكم جميعاً تحياتي ..
و آسف على الإطالة