محمد مخفي - تجارب شعرية
نوصيك يا وليدي خطيك من ذوك
من الحلو يذوقوك
من المرار يشربوك
فالوجه يشكروك
فالصح ينكروك
نوصيك خطيك من ذوك
عند حبابك ينصروك
مع عدوك ينشعووك
بالورد يشاوقوك
بالشوك يغطوك
نوصيك خطيك من ذوك
فالفايدة يشاوفوك
فالدين يغارقوك
فالهدرة(الكلام) يعجبوك
فالعشرة يعدبوك
نوصيك خطيك من ذوك
فالرزق يصاحبوك
فالفقر يهجروك
فالهناء يرافقوك
فالمرض يعايروك
نوصيك خطيك من ذوك
فالكفر يدخلوك
من الملة يخرجوك
فالحرام يمرغوك
من الحلال يهربوك
لو كان جبروا فالموت يحسدوك
نوصيك خطيك من ذوك
|