[حديث الروح]

يا عين حاجي بكا يا عين حاجي نوحْ
يا عين ظَلتش على الفُرقا طويلة روحْ
لما تفرقوا الأحباب بات القلب مجروحْ
وتباعدت لِدروبْ يَمّا وكاسْ الهَمّ مَطفُوحْ
************
راحوا ولا ودعوني يا يما شحم قلبي ذابْ
ما اصعب العيشة يا يما علي الّي مْفارْقِ الأَحبابْ
كل ما هب الهوى وخرخش عَ حَدّ البابْ
طَلّيتْ مِنْ لَهْفِتِي أَستقبِلْ الغِيّابْ
************
مريت عن داركم يا يما لا احتشي ولا اتكلمْ
يا دمع عيني يا يما على الحيطان علمْ
وحجارة العُقّادْ تِحْتشي وانا اتألمْ
رَحّلْ حَبيبي ولا وَدّعْ وَلا سَلّمْ
************
مريت ع بيوتكم يا يما وانّو الهَرِجْ فيها
واسْتَرّ قلبي يا يما هَذُولْ اصحابها فيها
طَلّتْ عَليّ حمامة من طواقيها
لا تفرحي يا عين مش هُمّي أهاليها
************
يا حسيرتي حَمّلوا عَ جْمالِهُمْ شَدّوا
وبيوت من خيش يُومِنْ حَمّلوا هَدوا
صحت يا اهل الهوى ع بيوتكم ردّوا
ما حد سمع صوتي ولا ع بيوتهم رَدّوا
************
روحوا طريق السلامة يا حبايبنا
يَلّي على فْراقْكُمْ بِكْيَتْ مَدَامِعْنِا
يا رب العباد ولا تِقْطَعْ مَراجينا
ولا تْشَمّتْ حَدَا يا خَالْقِي فينا
***********
يا نوق سيري وعين بفراقهم عِنّي
وفراقهم يما غَصِبْ مَا هو رِضَى مِنّي
يا نوق استعجلي بِرْجوعْ مِتْهَنّي
تا نْجَدِدْ افراحْ الوطن بَاعراسْ وِنْغنّي
************
يا حاديَ العيس سَلّمْ عَ بُويْ وِامّي
سلامْ مِن خَاطِرِي وسلام مِنْ ثِمّي
يا حادي العيس جَمّعْنِيْ وَبُويْ وامّي
وَاشلح ثياب السفر واشكيلهمْ هَمّي