مقدمة مسلسل أرابيسك
كلمات: سيد حجاب
ألحان: عمار الشريعي
غناء: حسن فؤاد
و ينفِلِت من بين إيدينا الزمان
كإنه سَحبة قوس في أوتار كمان
و تنفرط الايام عود كهرمان
يتفرفط النور و الحنان و الأمان
و ينفلت من بين إيدينا الزمان
الشر شرق و غرب داخل في حوشنا
حوشوه لا ريح شاردة تقشقش عشوشنا
حوشوا شرارة تطيش تشقق عروشنا
و تغشنا المرايات تشوش وشوشنا
و تهيل تراب ع الهالة و الهيلمان
الغش طرطش رش ع الوش بوية
ما درتش مين بلياتشو أو مين رزين
شاب الزمان و شقيت .. مش شكل أبويا
شاهت وشوشنا تهنا بين شين و زين
ولسه ياما و ياما حنشوف كمان