جواب الديب وتوحيشه
يادياب البشر ..... ياديـــاب
أنـــــيابكم هــــى الأنيــاب
***
لو واحـــد يـلاقي التاني
ما كانشي مشي واحـــداني
حتشـــوف الهلال الثــابت
في حـــضن الليالي نابـــت
وتشــوفه بيحــبي وينهــض
وتقول يا قمر ليه أبيض ؟!!
ويـــقولك عـــيوني شابت
بـتــدور على الأحــــباب
ياديــــاب البشر يا ديــــاب
أنــــيابكم هـــيا الأنـــياب
***
لا أهـــــي ولا أواهــــــي
ولا كنت الرقيق الواهـــــي
ولا فـــج وشقي ومفجـــــوع
أنا لونــي تراب موجــــوع
وأنا خشــمي بلون الشامــة
وياخدني العــطش والجــــوع
للـقــلب اللي في الشمامــة
أنا أكـــسر عليه البـــاب
يادياب البشـر ... يا دياب
أنيـــابكم هيا الأنيــــاب
***
واللـيلة بيعوي الحــــس
الديــب الجعـان بيعـــس
والليلة بيعوي الصـــوت
لو يحـــكم علياالمــــوت
علشان أفتـــدي من الموت
أظلم له أخـــويا ودمـي
أنا أفضل أمــوت متـغمي
وحيــاة الظــلام والغاب
يادياب البشر ... يادياب
أنيـــابكم هيا الأنيــاب
*****
ومصــــير البرئ يتـــــبرأ
وأنا باحلم برمل يــورق
وحــــزام المزارع الازرق
وبالاخضر وبالليــــموني
وأنا عيني كما المكـسـورة
من يوســف جميل الصــورة
إخــــــواته بيتـهـموني
مين صـــادق ...ومين كداب
يادياب البشر ... يادياب
أنيـــابكم هيا الأنيــاب
*****
شعر بالعامية المصرية
من ديوان رقص ومغنى - الرقصات
فؤاد حداد
__________________
دمتم
بحسن السمع وطيب المقام