[سمعجى]

أما التفاصيل الأخرى ، فكنت أطلع عليها باسهاب ، كلما ارتفعت صرخات أنوسة الأوبرالية المستنجدة ، بينما الأستاذ على ( يعجنها ) ضربا ، و قد أغراه ضخامة الهدف و عجزه عن الفرار ..

و كالعادة ، تهرع الست جليلة نحو شقتنا و تطرق بكلتا يديها على الباب مستغيثة : الحقونا يا ناس .. الظالم المفترى هايموتها ..

وباعتبارى المنقذ المنشود أنا و أم احمد ، فقد كنت أهرع الى موقع الحدث من باب الفرجة و التسلية و الاطلاع على آخر فضائح أنوسة البلكونية ، و غالبا ما أجد أنوسة قد ارتمت على السرير(مسخسة ) ، بينما الأستاذ على يجلس قبالها (مفرهدا) و محمرا ، و قد غمرت و جهه سيول من العرق اللامع ، فيجأر بالشكوى بمجرد أن يرانى قائلا :

الدبة بنت الدبة عاملة لى حبيبة .. مش كفاية انها ماسحة التلاجة أول بأول .. تلاتة كيلو جوافة ( سكرى ) درجة أولى ، تحدفهم بكيسهم للواد الصايع ابن عم صالح البقال .. و دكى النهار ، تسحب من ورايا أربع تفاحات أمريكانى من الصنف المخرفش اللى قلبك يحبهم ، و ترميهم م البلكونة للواد أوصة ( الفلاتى ) اللى مسيح برطمان فزلين على شعره ( لم تصله بعد ثقافة الجل ) ،
ولا يوم البطيخة الحجازى .. حد فى الدنيا
يفرط فى بطيخة حجازى ( قالها و هم بالهجوم على الجثة المتأوهة الملقاة مثل قنطار قطن بعرض السرير ) ، ارتميت فى حضنه الوسيع محاولا ردعه ، و أسهب متباكيا :

أنا اتهزأت فى الحتة بسبب الملعونة دى ، عارف يا بو احمد ( قالها و قد هدأت أنفاسه المتسارعة ) ، من كام يوم لقيت شوية مانجة فونس ريحتهم ترد الروح ، رحت شارى عداية على ابوها ( قفص بأكمله ) .. تصدق باللى خلقك ( قالها وقد اقترب من وجهى كأنما سيفشى لى بسر عظيم ) ما نابنى منهم غير تلات منجايات !! تانى يوم رايح أحلق عند عمك أبو أشرف ، يقوم يقوللى انت جبت المانجة الحلوة دى منين ؟! .. جيت لاعن سلسفين جدوده هو وابنه أشرف اللى عامل لى روميو ..
طب جولييت كانت رفيعة ( قالها و هو يقفز غاضبا تجاه أنوسة ، بادئا فى وصلة أخرى من العجن ) لكن أنا عمال أعلف فى سيد قشطة !!
و الهانم اللى تسد عين الشمس ( يقصد جلاجل ) سايباها على حل شعرها ، آل ايه خايفة ليفوتها قطر الجواز !! قطر لما يفرمك انتى و هى ف ساعة واحدة ، وتدارك رافعا طبقة السرسعة :
دا انا طاحن نفسى فى الدروس الخصوصية عشان ألاحق عليكم أكل لما خسيت النص ، ثم أردف متحسرا و مهزوما : فونس تصدير أصلى من بتاع مزارع أبو دياب .. ثم قال متفاخرا :
أصل محسوبك خبير فى المانجة !!