[سامية]

السلام عليكم ورحمه الله وبركاته
أوجه شكري لكل من شاركني ذكرياتي بهذه القصيدة

استاذنا ابو حسام والله مش عارفه أقولك ايه على تحليلاتك وعلى خفة دمك في الكلام .. وربنا يبارك في اولادك وتفرح بيهم قريب ويملوا عليك الدنيا أحفاد تتطلع عينك برضه .. بس هايكون على قلبك زي العسل

شكرا لك يا غازي وباشكرك كتير على دعواتك ليا .. وربنا يسعدك في حياتك ويبارك لك في أهل بيتك

شكرا لك يا حسن مع ان كلامك برضه لم يخلو من التريقة والمزاح .. بس عايزه اقولك حاجة مهمة يا حسن .. معظم المصريين الذين لم يحالفهم الحظ بزيارة الفيوم متخيلين انها زي ما انت قولت كده .. فلاحين وجلابية وأراضي زراعية وتربية طيور .. الصورة اللي كانت بتجيبها السينما زمان عن الفيوم
عايزه اقولك ان محافظـــة الفيـــوم من أجمل محافظات مصر من حيث طبيعة جوها واماكنها السياحية .. الفيوم كمدينة زيها زي أي مدينة تانية في مصر ونالت حظها من المدنية اكتر من محافظات تانية كتير .. طبعا يوجد بها فلاحين واراضي زراعية وهذا بالمراكز وطبعا منظر الخضرة فيها رائع .. لكن انا كلامي عن المدينة بكلياتها وأنديتها والابراج التي بنيت فيها غير ان بها بحر يوسف يمر بوسط البلد والخروج مساءا للسواقي شئ بديع .. غير ان عندنا عين السيليين جميلة جدااا وطبعا بحيرة قارون وأوبرج الفيوم معروف جدا .. والأجمل والأروع منهم شلالات وادي الريان يمكن شوفتها كتير في اعمال سينمائية لكن عند زيارتها بيكون الاحساس مختلف .. اتمنى من الجميع زيارة هذه الشلالات للتمتع بصنع الخالق عز وجل فيها .. وهناك في محمية طبيعية تقدر تتمتع بكل ما فيها .. دي نبذة بسيطة جداااااااااا عن الفيوم حبيت اوضحها للاستاذ حسن

الاستاذ مختار .. يا سلام على دعواتك ربنا يجعلها من نصيبي يارب وانت أب فاضل وغالي عليا جدااا .. يمكن عندك حق في كلامك بالنسبة للاغاني اللي اخدت حقها ونتوجه الى الاغاني المجهولة والقيمة .. لكن هانعمل ايه هي دي ذكرياتنا وفتحنا قلوبنا واتكلمنا بكل صراحة .. ربنا يكرمك ويبارك في صحتك يا استاذنا

الباشمهندس ايهاب .. شكرا ليك كلامك المرح وخفة الدم .. والجميل ان سني 35 سنة وانت بتقول 40 سنة زواج .. يا سيدي يسمع منك ربنا واحتفل بالعيد الاربعين لزواجي .. ودعواتي لك بالسعادة في حياتك وربنا يبارك في بناتك وتفرح بيهم يارب

الاستاذ سمعجي .. باشكرك على تصحيح الكلام ويمكن انا قولت في البداية وطلبت ان من يجد خطأ بالكلمات فليتفضل بتصحيحها .. وانت بصراحة عملت الواجب وزيادة حبتين .. شكرا لمعلوماتك القيمة واحنا معاك في يومياتك الرائعة

بذمتكم في أحسن من كده صحبة .. في أجمل من كدة عائلة الواحد بيتونس بيها وبيستفيد منها .. ربنا يديم هذه الصحبة وهذه المحبة وهذه الروح بينا
كفاية كده لان عنيا دمعت وانا باكتبلكم
مع خالص تحياتي