الأستاذ عبد الوهاب والسنباطي
مرة واحد صاحبي كان عارف طبعا إني فنان كبير 
فسألني سؤال غريب شوية .. إنت بتحب عبدالوهاب أكتر ولا السنباطي . ؟
من غير ما أفكر قلت له عبد الوهاب طبعا ..
قاللي : كنت متأكد إنك هاتقول كده من كتر حبك لموسيقاه ..
بس أنا باقول إن السنباطي كان أتقل من عبد الوهاب .
قلت له : بناءاً عن إيه بنيت رأيك ..
طيب انا لما قلت عبد الوهاب .. كان في دماغي كل مطوعاته الموسيقية الجميلة المعروفة عنه ( عزيزة و خطوة حبيبي وحبيبي الأسمر وزينة وليالي لبنان وقمر 14 و....و ........)
وكمان في دماغي جميع ألحانه الجميلة لكل المطربين .. وإنه إزاي كان بيفصل اللحن على مقاس المطرب أو المؤدي لإنه لحن للعديد من المؤديين بجانب المطربين ،، وكل أوبريتاته المتنوعة ..
دا غير طبعا ألحانه لنفسه ..
وغير إنه مطرب مافيش بعد كده ..
وغير وغير وغير ..
وجاي تقوللي السنباطي .. ودا طبعا مش تقليل من قيمة رياض السنباطي ، ولكن من وجهة نظري إن طبعاً عبد الوهاب بيعجبني أكثر.
رد عليا وقاللي : هل عبد الوهاب عرف يعمل حاجة زي الأطلال ولا حيرت قلبي معاك ..
ومن هنا حسيت إن كلامه كله هايبقى أي كلام ..
وطبعا سكت وحبيت أنهي الحوار .. لكنه استطرد وقال مافيش حد نجح مع أم كلثوم زي السنباطي ..
رديت عليه بهدوء وقلت له : هما طبعا أغنيتين ما فيش بعد كده .. بس دول عمرهم ما يبقوا مقياس للنجاح والفشل ..
ولو بنفكر زيك كده .. يبقى نقدر نقول إن السنباطي تقريبا فشل مع الناس كلها إلا أم كلثوم ..
وبصراحة كده .. أنا ماعرفش غير أغنيتين بس للسنباطي مع عبد الحليم ، وفي نظري الشخصي .. الإتنين أفشل من بعض .. وهما لحن الوفا ، وأنا وإنتي وانا ..
والدليل على كده إنهم مش هاتلاقي كتير حافظهم زي أي أغنية تانية لعبد الحليم .. لإنهم ماعلّموش جوه إحساس الناس.
بعكس عبد الوهاب .. إللي ما شفتش ليه أغنية ممكن يتقال عليها أي كلام .. كما أن كل موسيقى تعجب أي واحد ويسأل عليها غالبا ما بتطلع لعبد الوهاب ..
كما أن عبد الوهاب دائما ما كان سباق في ألحانه .. واللي فعلا يتقال عليها سابقة عصرها ..
وعموما في الأول وفي الآخر كل كلامنا دا من وجهة نظر غير علمية طبعا .. وسواء عبد الوهاب أو السنباطي الإتنين أساتذة كبار الله يرحمهم ويعوض علينا ..
وفي الأول وفي الآخر دي مجرد دردشة ..
تحياتي واحترامي
غازي