[غازي الضبع]

طبعا إنتو أدرى مني يا جماعة في هذا الموضوع ولو إني كنت أعزف أورج زمااااااان ، طبعا مش عزف عزف يعني .. ولكن كده يعني على ما تفرج وكنت أحب قوي أعزف مقطوعتي إنت عمري وأمل حياتي ..
وكنت فاكرهم ساهلين لكن عرفت بعد كده إن العملية معقدة فعلا على رأيك يا آلاتي ..
بس أنا عايز أقول حاجة تانية خالص ..
باحس كده إن كل ملحن بتغلب عليه روحه الشخصية في ألحانه ..
ويمكن أكبر مثال هو اللي بنتناوله حاليا الموسيقار منير مراد .. فكل ألحانه تحس كده إنها عليها بصمة منير مراد الخفيفة المرحة ، طبعا الأمثلة كتير ..
حاجة غريبة ، باحلم بيك ، وحياة قلبي وأفراحه ، سونة يا سنسن ، وغيرهم كتير دا غير أغانيه هو والاسكتشات الجميلة بتاعته ..
كذلك الموسيقار الجميل محمد فوزي .. والتي كانت روحه الشخصية مرحة جدا في الطبيعة ..
أما الأستاذ عبد الوهاب فكان ( من وجهة نظري ) موسيقار محترف ،، يعني مالوش دعوة بروحه الشخصية ، بل بروح الأغنية لو عايزها تبقى مرحة هاتبقى في منتهى المرح .. ولو عايزها تبقى نكد هاينكد على المطرب وعلى السميعة كلهم ..
يعني مثلا أنا مافيش مرة أسمع أغنية أيها الراقدون تحت التراب ولا أبكي .. حتى لو كنت في وسط فرح من الأفراح وسمعتها ، مابمسكش نفسي عن البكاء ..
في حين مثلا إني باحس إن في ألحان جميلة جدا بس مش ماشية مع الكلمات ..
وعلى سبيل المثال ( من وجهة نظري ) أغنية موعود .. الحتة بتاعة وميل وحدف منديله كاتب على طرفه أجيله .. طبعا في منتهى الجمال بس حاسس كده إنها مش ماشية كلحن مع كلمات الأغنية التي يملأها العذاب والوعد وإن قلبه عمره مابيرجع المشوار بفرح ..
طبعا يا جماعة أنا مين عشان أتكلم على الموسيقار الجميل بليغ حمدي ، وأنا لا أقصد أي هجوم أو نقد لا سمح الله ..
لكن أهي مجرد دردشة ..

تحياتي واحترامي
غازي