مقام نكريز - درجته الرابعة ؟ سؤال للمتخصصين

[guest]

سؤال في منتهي البساطة و منتهي الهدوء و من غير عصيبة

مقام النكريز

1.لقيت قي كتاب انه جنسين
جنس الجذع .. نوا اثر علي الدو ( راست ) = دو - ري - مي بيمول - فا دييز
و جنس الفرع .. نهاوند علي الصول ( نوا ) = صول - لا - سي بيمول - دو

2.لقيت في كتاب تاني التالي
جنس الجذع ( سموه زي ما تسموه مش عارف ايه علي الدو راست ) = دو - ري - مي بيمول - فا نص دييز ( الفا مرفوعة ربع تون بس )
جنس الفرع نهاوند علي الصول نوا برضه ( مفيهوش مشكلة عندي ) = صول - لا - سي بيمول - دو

3.لقيت في كتاب تالت التالي
جنس الجذع .. نوا اثر علي الدو ( راست ) = دو - ري - مي بيمول - فا دييز
و جنس الفرع ايه بقي ؟ راست علي الصول ( نوا ) = صول - لا - سي كاربيمول - دو

انا خلاص سيبت موسيقي الجاز و البوب ميوزيك و اللاتين ميوزيك و الجيتارات و الدرامز و كل الانواع اللي اعرفها .. و مش هاشتغل حاجة .. غير لما افهم ايه الكلام دا !
و مش ورايا شغلانة غير الموسيقي العربي اللي كل واحد فيها ب رأي .. مين الصح في ال 3 ؟
و يا ريت ما اتصدمش و اكتشف ان موجود اراء اكتر من ال 3 دول .. عشان ها يجيلي صدمة موسيقية كدة

ايه بقي الصح في التلات حاجات دي ؟ عشان كلها كتب محترمة و ناس معروفة !

و بالنسبة لجنس الجذع او جنس الاصل في مقام النوا اثر اللي هو من عائلة النهاوند الكريمة ( الرابعة الفا المسماة فارسيا جهاركاه مرفوعة نص و لا ربع ) ؟

و اتمني ان الرد يكون من اكتر من موسيقي في سماعي .. عشان نتناقش في الموضوع دا
و مستني رد من الاستاتذة المتخصصين في المقامات و الموسيقي عموما اصحاب الدراية

هل من رد ؟ انا مستني الرد من حبايبنا في المنتدي

تحياتي و تقديري للجميع

[الألآتى]

شوف ياعم إيهاب

أنا حاقول كلامى وأخرج .. ومش حاتشوف وشى تانى :crazy:

علشان إنت كده عملت لنا رعب بكلامك

النكريز من فصيلة النوا أثر ..

وهو جمع متصل .. يتكون من عقد نوا أثر على الدو ( راست ) وجنس بوسليك على النوا

والعقد يختلف عن الجنس لأنه أكثر من أربعة نغمات .. يزيد عن التتراكورد

وسنلاحظ أن عقد النوا أثر وجنس البوسليك يشتركان فى نغمة النوا .. لأنه جمع متصل

ومافيش ربع تون

ملحوظة : المقام الذى جنسه الفرعى راست .. هو مقام بسنديده .. وليس نكريز

[guest]

شوف ياعم إيهاب

أنا حاقول كلامى وأخرج .. ومش حاتشوف وشى تانى :crazy:

علشان إنت كده عملت لنا رعب بكلامك

النكريز من فصيلة النوا أثر ..

وهو جمع متصل .. يتكون من عقد نوا أثر على الدو ( راست ) وجنس بوسليك على النوا

والعقد يختلف عن الجنس لأنه أكثر من أربعة نغمات .. يزيد عن التتراكورد

وسنلاحظ أن عقد النوا أثر وجنس البوسليك يشتركان فى نغمة النوا .. لأنه جمع متصل

ومافيش ربع تون
اققففششششششششششششششش

لا رايح فين و مش راجع تاني ؟
بالتفصيل حضرتك

انا كدة اتصدمت صدمة السنيييييين
كفااااااية .. عقد ايه و حلق ايه ؟
و مين ابو سنيدة دا كمان ؟
افهم !

:mdr:

[الألآتى]

اققففششششششششششششششش


لا رايح فين و مش راجع تاني ؟
بالتفصيل حضرتك

انا كدة اتصدمت صدمة السنيييييين
كفااااااية .. عقد ايه و حلق ايه ؟
و مين ابو سنيدة دا كمان ؟
افهم !

:mdr:


أنا ماكنتش عايز أدخل وأرد من أولها .. انا إللى جبته لنفسى ;)

ماشى .. نرد ورزقنا على الله

المقامات ليست أجناس فقط

معروف أن الجنس عبارة عن أربع نغمات متتالية ( تتراكورد ) .. خلاص .. ماشى

لكن هناك أجزاء مقامات أكثر من أربع نغمات .. لذا سميناها ( عقد ) وهى موجودة فى النوا أثر والنكريز والبسنديده .. ألخ

وهناك أيضاً أجزاء أقل من أربع نغمات .. لذا سميناها ( طبع ) وهى موجودة فى السيكا ومشتقاتها والصبا أيضاً .. حيث أنهم جمع متداخل ( ليس منفصل ولا متصل )

إذن عندنا الجنس والعقد والطبع ..

أما البسنديده .. فهو مقام من مشتقات النكريز .. ويتكون من عقد نواأثر على الدو .. وجنس راست على النوا

ما إحنا قلنا قبل كده .. إن المقامات الشرقية مالهاش عدد ..

[guest]

طب خد دي بقي و انا اللي مروح

ابو سنيدة عندي في كتاب

جنس نوا اثر علي الدو او عقد متصل لو زودنا الصول
و جنس( بوسليك او نهاوند ) علي الصول , مكتوبة بوسليك بس النوتة جنس الفرع نهاوند علي الصول

و انت نازل نازل راست علي الصول و راست علي الدو

الرحمة يعني :mad:

[guest]

شكرا جزيلا علي التوضيح الرد

بس مش كفاية كدة .. انا كدة ( اغمن عليا )

بقولك ايه طيب يا استاذ محمد

الواحد كدة تعب معاكم

تنصحني ب كتاب ايه يكون موثوق فيه و مش مشموم ؟
عشان كدة بالطريقة دي , هتلاقي عندك في الصالون مني كل يوم سؤال وكل سؤال كام سؤال جوا بعض و انا مش بخلص اسئلة

دانا كنت ناوي ادخل علي الحجاز و الفرق بين الحجاز عادي ابو فرع نهاوند و الحجاز اللي فيه بياتي ! بس لما افوق من الصدمة دي و حد يسندني من ابو سنيدة دا

تحياتي ل حضرتك

[guest]

استاذ محمد

بص علي النوتة و طمني ان انا فقت من الصدمة

انا مش برتاح غير لما النوتة تتكتب !

كلامك دا انا بوثقه بالنوتة و الملحوظات عليه .. عشان ما يضيعش في الرجلين
و تاعبينك معانا و شكرا مقدما

تحياتي و تقديري

[الألآتى]

طب خد دي بقي و انا اللي مروح

ابو سنيدة عندي في كتاب

جنس نوا اثر علي الدو او عقد متصل لو زودنا الصول
و جنس( بوسليك او نهاوند ) علي الصول , مكتوبة بوسليك بس النوتة جنس الفرع نهاوند علي الصول

و انت نازل نازل راست علي الصول و راست علي الدو

الرحمة يعني :mad:



يييييييييييييه .. نقول تور .. يقولوا إحلبوه

أولاً البوسليك هو النهاوند .. ماتحيرش نفسك

ثانياً لو جنس الفرع نهاوند .. يبقى نكريز ياعمنا ..

بص ياعم إيهاب من الأخر كده

هما ثلاثة مقامات يشتركون فى جنس الجذع .. وهو النوا أثر

مقام النوا أثر وجنسه الفرعى حجاز

مقام النكريز وجنسه الفرعى نهاوند

مقام بسنديدة وجنسه الفرعى راست

العملية مش محتاجة اللخبطة دى كلها

وبعدين نقول جنس نقول عقد .. النتيجة واحدة .. الفرق بيظهر أثناء التلحين

[الألآتى]

شكرا جزيلا علي التوضيح الرد

بس مش كفاية كدة .. انا كدة ( اغمن عليا )

بقولك ايه طيب يا استاذ محمد

الواحد كدة تعب معاكم

تنصحني ب كتاب ايه يكون موثوق فيه و مش مشموم ؟
عشان كدة بالطريقة دي , هتلاقي عندك في الصالون مني كل يوم سؤال وكل سؤال كام سؤال جوا بعض و انا مش بخلص اسئلة

دانا كنت ناوي ادخل علي الحجاز و الفرق بين الحجاز عادي ابو فرع نهاوند و الحجاز اللي فيه بياتي ! بس لما افوق من الصدمة دي و حد يسندني من ابو سنيدة دا

تحياتي ل حضرتك

من غير مايغمن عليك ولا حاجة ..

إحنا معاك للأخر .. ومابنزهقش

أما حكاية الكتاب دى .. بصراحة مش حاضرنى حالياً كتاب معين .. لأن معلوماتى جاية من عشروميت حتة ومكان

وعلى مدى أربعون عاماً .. حافتكر إيه ولا إيه

[الألآتى]

استاذ محمد

بص علي النوتة و طمني ان انا فقت من الصدمة

انا مش برتاح غير لما النوتة تتكتب !

كلامك دا انا بوثقه بالنوتة و الملحوظات عليه .. عشان ما يضيعش في الرجلين
و تاعبينك معانا و شكرا مقدما

تحياتي و تقديري

أوكيه .., النوتة تمام

بس أنا مش عارف ليه الإصرار ده من أصحاب الكتب .. إنهم يذكروا المقام طالع نازل

إيه المشكلة يعنى لما يكون سى فى الطالع وسى بيمول فى النازل .. أو العكس

الكلام ده لما يكون فيه جنس مكمل زى الصبا والهزام .. ألخ

وبعدين إحنا بنقول إن المقام عبارة عن جنسين .. كذا وكذا ..
لازمته إيه بقى نرجع ننزل بالمقام .. ونكتب النوتة رايح جاى

[guest]

أوكيه .., النوتة تمام

بس أنا مش عارف ليه الإصرار ده من أصحاب الكتب .. إنهم يذكروا المقام طالع نازل

إيه المشكلة يعنى لما يكون سى فى الطالع وسى بيمول فى النازل .. أو العكس

الكلام ده لما يكون فيه جنس مكمل زى الصبا والهزام .. ألخ

وبعدين إحنا بنقول إن المقام عبارة عن جنسين .. كذا وكذا ..
لازمته إيه بقى نرجع ننزل بالمقام .. ونكتب النوتة رايح جاى


في الكتب الغربي تفرق في السلالم المينور الطلوع من النزول .. حضرتك سيد العارفين
السلالم ماجور طالع زي نازل , مش فارقة
حتي في سلالم الانواع الموسيقي التانية زي الجاز و الروك و غيرها .. مفيش قاعدة ثابتة , طالع حاجة و نازل حاجة و اسمه تلوين في الاخر

العربي بقي
مش عارف
المشكلة انه نازل ب يشقلب الدنيا و يغير الاسم و العنوان .. و يجيبلي عصبي .. شوية نظام يعني !
يعني علي وصفك لل بسنديده.. و اللي انا قريته قبل كدة .. بسنديده بتاعك هو في الكتاب نكريز طالع و راست نازل ! دا كلام يعني ؟ اعمل انا ايه بقي ؟ و النوا اثر حبة الفا مرفوعة نص و حبة مرفوعة ربع ! علي حساب مين الكلام دا ؟
انا بالنسبة لي في النزول و لا تعملي مشكلة .. تنويع , غيرت الدرجة نص تون و لا ربع و غيرت الجو , لونت شوية

انا كتبت النوتة بعد وصفك طالع نازل عشان انا متعود اسمع اي سلم طالع نازل .. و زيادة الخير خيرين يعني مش بتاخد ثانية علي سيبيليوس , شوية ضمير في النوتة عشان نطلع ب فايدة
و طالع نازل عشان لو نازل ( كمين ) فيه تغيير للمقام نقفشه .. مفيش يبقي براءة
شوف يا محمد بيك , زي ما حضرتك قلت المقامات ملهاش حصر , بس المقام اللي يقع تحت ايدي مش هارحمه غير لما اعرف اصله و فصله و جنسه و فرعه و عقده و فصيلته و عيلته ( مباحث امن موسيقية )

و اشكرك جزيلا علي تعبك

تحياتي و تقديري