تجارب وخبرات فى هندسة الصوت .. متجدد

[guest]

هندسة الصوت علم كبير و بحر ملوش اخر

انا بعيد تمام البعد عن هندسة الصوت , و لكن طبيعة عمل الموزع الموسيقي تحتم عليه الاحتكاك ب صورة دائمة.
و دايما مهندس الصوت و الكلام دا يعرفه الموزعين المحترفين , ممكن يخلي شغلك في السما , و ممكن يجيبه سابع أرض.
و لاحظت ان كتير من الموزعين فعلا بدأوا يتعلموا هندسة الصوت عشان ما يكونش تحت رحمة مهندس الصوت او عشان يقدر يوصله اللي عاوز يعمله.
الحقيقة دايما مهندس الصوت كان يقوللي , اعمل شغلك و سيب الماستر علينا
يعني بلاش العب في اي تراك من التراكات , ما اضيفش اي صدي صوت مثلا أو اعلي صوت تراك و اخفض صوت تراك.
اختصارا , انا ما كنتش مهتم ب موضوع المعرفة عن هندسة الصوت , و الحاجات اللي اعرفها بتكون مش علي اساس علمي و بالاحساس كدة.
في مصر عندنا حاجة غريبة جدا , لو جيت تسأل مهندس الصوت علي حاجة عشان تتعلم , يتنفخ في نفسه و يعمل فيها عارف اللي ما حدش يعرفه , او مثلا هيقوللي سر حربي او عسكري ! و ياريت يقوللك حاجة ! دا يستخبي منك و يقولك بعدين بعدين و يتهرب منك !
في بلادنا العربية عامة في اتجاه ل تعميم الجهل و عدم نشر الثقافة و تبادل المعرفة و زيادة عليهم كره النجاح للغير و تهميش الاخرين , داء مش عارف ايه سببه و حاولت البحث عن اسبابه , و دا موضوع يطول شرحه ومش مكانه لأنه موضوع شائك و متشعب و سيكولوجي خطير.

زي ما قلت هندسة الصوت دي بحر , و مش شغلتي .. و لكن سألت مهندس صوت صاحبي ( اجنبي ) كنا بنعمل حاجة سوا و سألته و انا خايف و مرعوب و مكسوف جدا ( عشان عندي خبرة سيئة مع مهندسين الصوت ) يعني ايه Panning ؟
اللي حفزني علي اني اسأل ان انا كنت عملت موسيقي و التعليق كله كان علي النقطة دي ( التعليق كان في محله
الصراحة و كان من اساتذة كبار و اقدرهم و احترمهم كثيرا و اوضحولي بعض معلومات )

الراجل ب منتهي البساطة شرحلي يعني ايه Panning
و انا حبيت انشر اللي اتعلمته منه عشان اللي عاوز يستفيد

في الستيريو عندك سماعة يمين و سماعة شمال
رجاء ملاحظة ان
( R ( Right = يمين/ ( C ( Center = المنتصف / ( L ( Left = شمال
عشان هاستخدمهم كتير
المدي بيكون من + 100 % في اليمين / لحد - 100 % في الشمال

لو عملت التراك مثلا L90 او -90 % بيقي تركيز الصوت الصادر جاي من السماعة الشمال
لو عملت التراك C او 0 .. يبقي الصوت طالع متوازن من السماعتين زي بعض
عادة في الموسيقي , الات موسيقية معينة و اصوات معينة بتظهر مع بعض في نفس التوقيت و في نفس النطاق الصوتي للستيريو .. من الناحية التقنية ممكن تعمل Pan لأي صوت في اي مكان.
و لكن الهدف بتاعك ايه ؟ انك تعمل Pan للالات و الاصوات بحيث ان هما يدوا فرصة ل بعض للظهور بشكل جميل للأذن و كل صوت يلعب الدور المطلوب منه .. و اذا ركزت الاصوات كلها في منطقة ال C مثلا , ها تبقي مش مزيكا , هاتبقي دوشة زي وابور القطر.كل ألة او صوت محتاج المساحة بتاعته في الستيريو.
الراجل قاللي مثال علي موسيقي البيتلز Beatles , انهم في التسجيلات كانوا بيعملو Pan للاصوات الغنائية Vocals للأقصي الشمال و الدرامز Drums لأقصي اليمين .. واجهوا انتقادات واسعة ساعتها عشان مش معقول انك طول الاغنية تسمع صوت المغني من السماعة الشمال بس خاصة لو انت بتسمع ب سماعات Headphones من اي بود Ipod دلوقتي او ما شابه.و بالفعل ما فاتش وقت كبير علي الكلام دا.و اتنهت ( من النهي ) تماما تجربة Panning بالطريقة السيئة دي ( و كانو مين ؟ Beatles !! )

الراجل كتر الف خيره اداني قياسات شبه متعارف عليها بين مهندسين الصوت عموما
و هي دي اهم نقطة في الموضوع كله
و معذرة ان صاحبي دا اجنبي , القياسات اللي قالهالي تنطبق علي الات زي الجيتار و الدرامز و البيانو و هكذا ملوش في الشرقي , و لكن ممكن الاستفادة منها في الات تانية
للتذكير تاني
C=Center, L=Left, R=Right
و افضل ان انا اكتبها بالانجليزي زي ما قفشتها منه و كتبت وراه لما شرحهالي

Lead Vocal - C0
(double and triple vocals are panned in multiple areas)
Snare - L5, or C0, or R5
Kick Drum - C0
Hi Hats / Wood Hit, Clicks, Snaps, Etc. - Between L35 to R35
Cymbals - Between L10 to R10
Bass Guitar - Between L10 to R10
Lead Guitar - Could be anywhere, but usually "at least" 20L or 20R
Keyboards, Piano, Horns, Violins - Between L80 to R80 or stereo

طبعا الاعتماد يكون علي الاغنية و التوزيع
يعني بعض الاحيان يكون البيانو L45 او R45
و في الحان موسيقية مختلفة ممكن يكون تكون جملتين مختلفتين ملعوبة بألة واحدة وهي الكمان علي سبيل المثال , اللحن في السماعة اليمين مختلف عن اليسار.

و من النوادر انك تعمل Pan L90 , R90 , يستحسن تنزلها ل L80 او R80
Pan بالطريقة دي بيكون مبالغ فيه و وقعه سيء علي الاذن لما تسمع من سماعات Headphone
قاللي تعبير مضحك .. ها تحس ودانك بتسخن من الصوت اللي طالع من السماعة
بس لما نقول نوادر , يعني مفيش مستحيل .. قد يعمل احد الموزعين جمل تحتمل بان لأقصي اليمين او الشمال !

النصيحة اللي كلنا عارفينها طبعا .. عشان تتعلم الحاجات دي , لازم تسمع اعمال كتير ..( الحقيقة انا بسمع كتير جدا و لكن اهتمامي بالمزيكا نفسها مش بالحيل الهندسية دي ) و لكن لما قاللي علي الموضوع دا بقيت اخد بالي و انا بسمع , اه دا هنا في Pan و هنا معمول Reverb , هنا معمول Booster للتراك عشان ال Peak بتاع الاغنية او ذروة الاغنية .. و نكتب في ورقة صغيرة ملحوظاتك و تتعلم منها و هكذا.
في النهاية ازود حاجة قالهالي برضه و يبقي كلامي خلص النهاردة و لما اتعلم حاجة تانية هاكتبها هنا
في تسجيل الاصوات للمغني
الصوت الاساسي دايما C0
و لو فيه خطوط تانية لصوت المغني بيتعمل Pan في اي مكان يمين او شمال علي حسب الرؤية و ملهاش حسبة ثابتة و بالاحساس و علي حسب برضه تركيز الالات تانية و اماكنها فين.
اضافة و معلومة هاقتبسها من استاذنا احمد الجوادي بالنسبة لكيفية Panning لمجموعة الوتريات
( الكمان الأول على الشمال، وعلى يمين الكمان الأول وضعت الكمان الثاني، وفي الوسط وضعت الفيولا، وعلى يمين الفيولا وضعت الشيللو وعلى اليمين الكونتراباص، أي مثل ترتيب الأوركسترا الاعتيادي )

اتمني تستمعوا و تستفيدوا من الموضوع .. و دا تكنيك واحد من تكنيكات كتير في الهندسة الصوتية

تحياتي و تقديري

[عثمان دلباني]

الموضوع مهم و مفيد ارجو ان لا يقف عند هذا الحد :emrose:

[الألآتى]

أهم حاجة ياإيهاب .. إنك لم تحتفظ بالمعلومات لنفسك .. وقدمتها لنا وللجميع على طبق من فضة ..

ميرسيه ياحبيبى .. ونرجوا ألا تبخل علينا بأى معلومة جديدة ..

[guest]

الموضوع مهم و مفيد ارجو ان لا يقف عند هذا الحد :emrose:

اشكرك استاذ عثمان علي مرورك العطر

انا مش مهندس صوت زي ما ذكرت قبل كدة
و بالنسبة لي انتهي موضوع ال Panning
اتمني برضه انه لا يقف عند هذا الحد , و نلتقي في تكنيكات تانية

تحياتي و تقديري

[guest]

أهم حاجة ياإيهاب .. إنك لم تحتفظ بالمعلومات لنفسك .. وقدمتها لنا وللجميع على طبق من فضة ..

ميرسيه ياحبيبى .. ونرجوا ألا تبخل علينا بأى معلومة جديدة ..

عينينا ليك يا استاذ محمد

و لا ميرسيه علي واجب :)
ما ينفعش ابخل ب حاجة .. اول ما اعرف حاجات جديدة هاكتبها علي طول ل تعميم الاستفادة للجميع

تحياتي و تقديري

[guest]

انا مش هاتكلم عن تقنيات متقدمة في المكس ، لكن هاتكلم عن بعض الحلول الاساسية لاكثر مشاكل المكس شيوعا و انتشارا.

احنا عاوزين الموسيقى بتاعتنا تبدو افضل ما في وسعها.
النصائح الجاية ها تحسن كتير من النتائج ( هما 6 نصائح لكن كبار شوية )
نبتدي ؟

1. المكونات الإضافية و الستيريو Plug-Ins On The Stereo Out

عن وظائف الماستر ، لازم عدم وجود اي مؤثرات علي الستيريو ( من التراك الرئيسي).
لا Limiters ، لا Loudness ، لا EQ ، لا Enhancer , لا Panning وغيرها. ( كل كلمة من دول عاوزة شرح لوحدها , اتمني الاقي فرصة و اكتب شرح كل حاجة منهم )
يعني ايه مكس Mixing ؟ المكس هو دمج التراكات كلها مع بعض , و هي الخطوة قبل الاخيرة في اخراج العمل.
يعني ايه ماستر Mastering ؟ اختصارا ماستر يعني الخطوة الاخيرة في اخراج العمل الموسيقي او الاغنية كما ينبغي ان يكون.

2.النصيحة دي مهمة جدا في نظري عشان فيها قياسات و ارقام
و هي من جزئين A & B
ذروة الأغاني عالية جدا (peak too high ) / او ليس لديها المدى الديناميكي ( have no dynamic range )

فيه نوعين من العوامل نضعها في الاعتبار عند تصدير المكس النهائي

A. مستوى الذروة - المستوى الاعلى الممكن وصول اليه في الستيريو
B. المدى الديناميكي - تتراوح ما بين أعلى وأدنى مستوى للصوت في الستيريو

A ) مستوى الذروة - PEAK LEVEL
لازم أعلى جزء من الاغنية او الموسيقي ( مستوى الذروة ) يكون حوالي من 3-DB ل 5-DB ( أقل من المستوى 0DB )

يعني ايه DB او db ؟
DB هي اختصار للمصطلح Decibel
ديسبل او decibel هي وحدة قياس الازعاج او الدوشة

ملاحظة - في بعض الأحيان في الأغاني الذروة db 0 مستوى مفيش مشكلة منه ، إذا كانت ضربة سريعة (طبلة، درامز , الخ) تبلغ ذروتها. لكن من الاحسن انك تنزل شوية عن المستوى 0 من بداية المكس، لأن مفيش فايدة بالنسبة لك تبتدي حامي او سخن بالبلدي كدة.

علي طول ما تخليش المستويات تتجاوز 0 db على الستريو (من القياس الرئيسي) ، و ما تعديش ابدا 0 db على اي من التراكات الخاصة بك سواء اصوات بشرية أو الات موسيقية.

المرة الجاية نقول المدي الديناميكي dynamic range عشان نقفل النصيحة 2 , و نكمل النصائح من 3 ل 6.

[guest]

و نقفل النصيحة رقم 2 ب كلامنا عن المدي الديناميكي

B ) المدي الديناميكي - DYNAMIC RANGE

لما تلعب موسيقي او اغنية ، القياس او ال output meter نلاقيه يتحرك باستمرار صعودا وهبوطا, طالع نازل.
النطاق الديناميكي Dynamic Range هي المنطقة الواقعة بين مستوى الذروة Peak Level (في القياس عالي) و المستوي المنخفض Low Level ( في القياس او المتر منخفض ).
تقريبا ، التنقل بين 3db الي 5db علي قياس المتر و بين مستوى ارتفاع و انخفاض الصوت حركة جيدة مش بطالة ، ولكن دا يعتمد على نوع الموسيقى ( يعني مثلا الموسيقي الكلاسيكي غير الروك غير العربي ).
اذا طبقت مستوي Compression في قياس المكس الرئيسي اعلي من مستوي المكس DB0 , المتر مش ها يتحرك اكتر من 1DB دا لو اتحرك معاك , و دا غير مستحب .. يبقي نعمل ايه ؟ ننزل عن 0DB عشان المدي الديناميكي Dynamic Range يتحرك ب سلاسة بين 3 و 5 DB.

نلتقي من 3 ل 6 المرة الجاية , الكلام فيهم مش كتير و يمكن اكتبهم في مشاركة واحدة لما تيجي اقرب فرصة.

و يا ريت لو حد عنده اسئلة يقوللي
و لو فيه حد بيقرا و مش فاهم المكتوب يا ريت يقوللي برضه

[guest]

3.مكس براق او جاف زيادة عن الزوم ، سوبر ميكس للباص

بعض الاحيان نرتكب غلطات بالمبالغة في استخدام EQ , والاعتقاد انه بالطريقة دي بنوصل ل جودة الراديو المهنية السليمة.
المكس البراق دا Bright mix , ما يوصلكش ابدا ل نتيجة ماستر كبيرة او عظيمة لانه كان مبالغ في EQ.
يعني ايه EQ ؟ اختصار equalizer وظيفته تصحيح حاجة اسمها frequency ( تردد الصوت ) عند التسجيل و في بعض الاحيان ممكن استخدامه بطرق ماكرة لتزويد حيل صوتية خادعة و جميلة .
التردد frequency دي شرحها لوحده عاوزة واحد بتاع فيزياء , لو حد عاوز يعرفها بالتفصيل , يقولنا.
بالنسبة ل EQ
المفاجأة ان ملهاش حسابات !
طب نعمل ايه ؟
عندك حاجتين ممكن تشتغل عليهم .. و ممكن يكونوا اكتر من كدة ب كتير .. و لكن دي خطوط عريضة

اول واحدة :
ما تغيرش اي حاجة في الاسهم الخاصة ب EQ ..الا اذا حسيت ان الصوت اللي طالع من التراك مش عاجبك و سئ.
و لو لقيت نفسك بتعمل تغييرات كبيرة , وقف الشغل .. و روح مثلا اعمل ل نفسك واحد شاي و اشربه , و ارجع تاني للتراك
و اسمع اللي عملته .. و ساعتها بس قرر اذا كنت محتاجه و تستخدمه بالطريقة دي و لا لأ

تاني واحدة :
لما تسمع اللي بتعمله , و حاسس ان فيه حاجة مش عاجباك او غلط
ارفع ال Frequency الموجودة في ال EQ Band و اتحرك فوق و تحت لحد ما توصل للي انت عاوزه بالظبط و تتخلص من الترددات الغير مريحة بالنسبة لك و هتلاقي المشكلة راحت من نفسها.
نفس الكلام في تراك الباص , و يستحسن مراعاة الطريقة 2 في استخدامها

فاضل كدة 4 و 5 و 6

[Hisham Khala]

انا مش هاتكلم عن تقنيات متقدمة في المكس ، لكن هاتكلم عن بعض الحلول الاساسية لاكثر مشاكل المكس شيوعا و انتشارا.

احنا عاوزين الموسيقى بتاعتنا تبدو افضل ما في وسعها.
النصائح الجاية ها تحسن كتير من النتائج ( هما 6 نصائح لكن كبار شوية )
نبتدي ؟

1. المكونات الإضافية و الستيريو Plug-Ins On The Stereo Out

عن وظائف الماستر ، لازم عدم وجود اي مؤثرات علي الستيريو ( من التراك الرئيسي).
لا Limiters ، لا Loudness ، لا EQ ، لا Enhancer , لا Panning وغيرها. ( كل كلمة من دول عاوزة شرح لوحدها , اتمني الاقي فرصة و اكتب شرح كل حاجة منهم )
يعني ايه مكس Mixing ؟ المكس هو دمج التراكات كلها مع بعض , و هي الخطوة قبل الاخيرة في اخراج العمل.
يعني ايه ماستر Mastering ؟ اختصارا ماستر يعني الخطوة الاخيرة في اخراج العمل الموسيقي او الاغنية كما ينبغي ان يكون.

2.النصيحة دي مهمة جدا في نظري عشان فيها قياسات و ارقام
و هي من جزئين A & B
ذروة الأغاني عالية جدا (peak too high ) / او ليس لديها المدى الديناميكي ( have no dynamic range )

فيه نوعين من العوامل نضعها في الاعتبار عند تصدير المكس النهائي

A. مستوى الذروة - المستوى الاعلى الممكن وصول اليه في الستيريو
B. المدى الديناميكي - تتراوح ما بين أعلى وأدنى مستوى للصوت في الستيريو

A ) مستوى الذروة - PEAK LEVEL
لازم أعلى جزء من الاغنية او الموسيقي ( مستوى الذروة ) يكون حوالي من 3-DB ل 5-DB ( أقل من المستوى 0DB )

يعني ايه DB او db ؟
DB هي اختصار للمصطلح Decibel
ديسبل او decibel هي وحدة قياس الازعاج او الدوشة

ملاحظة - في بعض الأحيان في الأغاني الذروة db 0 مستوى مفيش مشكلة منه ، إذا كانت ضربة سريعة (طبلة، درامز , الخ) تبلغ ذروتها. لكن من الاحسن انك تنزل شوية عن المستوى 0 من بداية المكس، لأن مفيش فايدة بالنسبة لك تبتدي حامي او سخن بالبلدي كدة.

علي طول ما تخليش المستويات تتجاوز 0 db على الستريو (من القياس الرئيسي) ، و ما تعديش ابدا 0 db على اي من التراكات الخاصة بك سواء اصوات بشرية أو الات موسيقية.

المرة الجاية نقول المدي الديناميكي dynamic range عشان نقفل النصيحة 2 , و نكمل النصائح من 3 ل 6.



الحمد لله معظم DAW (برامج السمعيات) فيها Normalizing و هذا يغنيك عن متابعة db في كل Strip ، و يا باظت توزيعات عشان المكساج ، اما بالنسبة الي Panning ليس فقط وضع الآلات في اليسار و الوسط و اليمين و لكن أيضاً في الامام و الخلف فمثلا لو فيه 5 سماعات فيه واحدة سنترال و واحدة يسار في الامام و يسار في الخلف و يمين امام و يمين خلف ، و الأوركسترا ترتيب الآلات فيها كما ذكرت: الكمان اول في اقصي اليسار و الكمان 2 يليه و ألفيولا في الوسط و الشيللو و باص في اليمين ، و لكن ماذا عن آلات النفخ الخشبية و ماذا عن النفخ النحاسية و ماذا عن الكورال و الآلات الإيقاعية ، الأصوات الحادة يسار و الغليظة يمين و لكن في الداخل بالنسبة للوتريات ، برنامج السامبليتيود و الماجكس بيقدروا يضعوا لك الآلة في المكان اللي انت عاوزه يسار امام او يسار خلف و هكذا ، و المهم ان المستمع يسمع بسماعات كويسة

[guest]

4. التراكات المزعجة / اصوات Boomy

المشكلة ؟ احيانا بيكون فيه صوت همهمة منخفضة علي التراك المتسجل من الات موسيقية ، و الصوت الغنائي يكون عالي Booming زيادة عن اللزوم.الهمهمة او الدوشة دي بتعمل ايه ؟ بتاكل المساحة الصوتية او المدي الصوتي بتعمل زي ضباب او شوشرة ، و تغيم الاغنية كلها.
والغنا العالي دا بيتداخل مع خط الباص و الايقاع بشكل مش قد كدة و غير مستساغ للاذن.
نعمل ايه ؟
الحل
العب في الجزء الباص في التراك ( خلينا نتفق انه الصوت الغنائي المزعج )
نلعب ازاي ؟ بتعمل فلترة للتراك ما بين 150 و 300 HZ
يعني ايه HZ ؟ هي اختصار ل كلمة هيرتز Hertz , HZ هي وحدة قياس التردد Frequency
نكمل ؟ نلعب ازاي ؟ بتعمل فلترة للتراك ما بين 150 و 300 HZ , و اتحرك في المدي دا لحد ما توصل للصوت الامثل بالنسبة ليك.
تابع التراكات المزعجة في العمل و اشتغل علي تقليل او ابعاد الدوشة الغير مستحبة فيهم قدر الامكان , و دا عن
طريق استخدام ال EQ او فلترة التراك بالطريقة اللي شرحناها

فاضل كدة 5 و 6

[guest]

الحمد لله معظم DAW (برامج السمعيات) فيها Normalizing و هذا يغنيك عن متابعة db في كل Strip ، و يا باظت توزيعات عشان المكساج ، اما بالنسبة الي Panning ليس فقط وضع الآلات في اليسار و الوسط و اليمين و لكن أيضاً في الامام و الخلف فمثلا لو فيه 5 سماعات فيه واحدة سنترال و واحدة يسار في الامام و يسار في الخلف و يمين امام و يمين خلف ، و الأوركسترا ترتيب الآلات فيها كما ذكرت: الكمان اول في اقصي اليسار و الكمان 2 يليه و ألفيولا في الوسط و الشيللو و باص في اليمين ، و لكن ماذا عن آلات النفخ الخشبية و ماذا عن النفخ النحاسية و ماذا عن الكورال و الآلات الإيقاعية ، الأصوات الحادة يسار و الغليظة يمين و لكن في الداخل بالنسبة للوتريات ، برنامج السامبليتيود و الماجكس بيقدروا يضعوا لك الآلة في المكان اللي انت عاوزه يسار امام او يسار خلف و هكذا ، و المهم ان المستمع يسمع بسماعات كويسة


كلامك حلو يا دكتور
بس خليني ازود علي كلامك كام حاجة و اتمني من حضرتك و الاصدقاء في المنتدي تبادل الخبرات , انا قلت انا مش مهندس صوت وانقل هنا شوية حاجات بكون سألت عليها مهندسين صوت فعلا

الكام نصيحة او الارشادات اللي انا كاتبها ملهاش علاقة بتاتا ب الات اوركسترا , الكلام علي اغاني او موسيقي فيها جيتار - درامز .. يعني مهما كان عدد التراكات مش ها يكون ب ضخامة اوركسترا
بالنسبة لكلامك عن هندسة الصوت للاوركسترا ! حضرتك كدة دخلت في قصة كبيرة جدا .. لأن تسجيل الاوركسترا بيكون من علي المسرح عدل One take .. يعني مفيش تراكات ! يعني اصلا التسجيل بيكون في قاعة مجهزة ب حسابات معينة و دقيقة جدا ليها علاقة بال Acoustics ب معناها الكبير و بيكون فيه مهندس الصوت موجود قبلها و بيعمل ال Check Sound , حدوتة يعني ..
و حتي لو تسجيل استوديو , مش اي ستوديو ينفع معاه الكلام دا !
غير اصلا ان عدد الالات في الاوركسترا بيكون مرتبط ارتباط وثيق بالتوازن بين عدد الالات الوترية و الالات الاخري و كمان علي حسب الاوركسترا كبير و لا متوسط و لا صغير .. قصة Orchestration و حضرتك سيد العارفين .. ها نروح بعيد ليه ؟ كورساكوف شارح الكلام دا كله و عدد الالات و كيفية توزيع اماكن الالات علي القاعة و الخ الخ
انا شبه متأكد ان حضرتك اطلعت علي كتابه , و صعب اخنزال كلامه في كام سطر

انا مش عارف حضرتك بتسألني و لا ايه النظام ؟ عشان حضرتك سألت و جاوبت السؤال .. و كل كلامي دا كان دردشة مش اكتر :)

تحياتي و تقديري يا دكتور

[guest]

نختم النصايح او الارشادات ال 6


5. تداخل اصوات الدرامز والباص جيتار كل منهم في نفس مدي التردد

المشكلة - الدرامز و الباص جيتار باس في حدود نفس التردد المنخفض (50-75 hz )
تردداتهم الصوتية بيلغوا بعض , التراكين بيلغوا بعض و مش قادرين نميز الاتنين بشكل واضح من بعض و دي مشكلة و مفيش في ايدينا نعمل حاجة في الماستر
و لكن احنا عندنا مساحة كبيرة و فاضية في مدى التردد من 75hz ل 500hz.
المجال دا ممكن استغلاله بس هو فاضي !
الحل – في توزيع الاغاني او الموسيقي من البداية ، لازم تحدد مين في الباص أو الدرامز ها يكون مدي تردده
منخفض ( 50-75 hz ) و مين ها يكون مدي تردده منخفض متوسط (100-250 hz )
لو ها تعمل تردد الدرامز منخفض ، يبقي نعكس و نخلي الباس منخفض متوسط (والعكس صحيح).

6. الالات اصواتها حادة و مزعجة او الاصوات الغنائية فيها حدة غير مطلوبة

في المكس , لازم تعمل حساب ان المكس حاجة و الماستر خطوة بعديها.. يعني خليك مرتب , لما تعمل مكس , ما تزودش اي حاجة علي التراكات .. رتب بس التراكات و و بعدين في الماستر اللي هي اخر خطوة العب براحتك.
لأن لو لعبت في تراكات المكس , و جيت تاني تلعب في الماستر .. يبقي رقم 1 ضيعت وقتك و رقم 2 كررت مجهودك و يا ريته ب فايدة , بالعكس احنا كدة بنشوه و نبوظ اللي عملناه قبل كدة
يعني الاصوات اللي صوتها عالي ما ينفعش اقلل التردد بتاعها مرة في المكس و مرة في الماستر , كدة اسمه تكرار duplication , وكمان بتعمل انحراف للتراك و الترددات عن مسارها المطلوب deviation و بيكون شبه مستحيل تصليحه , الا بقي لو عملنا التراك من اول و جديد و دي تضييع وقت و مجهود و كمان محبط.

تحياتي و تقديري

[maystroofmusic]

أفادك الله أخي الكريم و نرجو دائما إمدادنا بالمعلومات و لك كل الشكر و التقدير على مجهودك المحترم

[أبو لينا]

السلام عليكم
أحاول أن اشرح الهندسة الصوتية في دروس بسيطة على يوتيوب
ابسط المعلومات قدر الامكان حتى يتمكن الناس من التعامل مع برامج الصوت
أعتقد أن عدد الفيديوهات الموجودة على قناتي تغطي معلومات مهمة لكل موزع موسيقي
وارحب بالتعاون والأجابة على استفسارات الاصدقاء

في هذا الفيديو مدخل تبسيط البروتولز .. مدخل مهم والشرح قوي

B4Tt_vK9F8g

https://www.youtube.com/watch?v=B4Tt_vK9F8g