كلمات أغاني كارم محمود [الأرشيف] - منتدى سماعي للطرب العربي الأصيل

ليلى ابو مدين

04/09/2012, 14h39

امانه عليك يا ليل طوّل

*****

كلمات فتحي قورة

الحان كارم محمود

*******

أمانة عليك يا ليل طوِّل وهات العمر مـ الأول
بحب جديد وقلبي سعيد يا ريتني عشقت عمنوِّل
أمانة .. أمانة .. أمانة .. أمانة أمانة يا ليلي يا ليل
يا ليل طوِّل على العشاق وقول للفجر ما يبانشِ
يهون العمر عالمشـتاق وســاعة القرب ماتهونش
يغني لك .. يا ليل يا ليل على السهران يا ليل يا ليل
ترد عليه نجوم الليل تقولْ له كـــمان من الأول
أمانة .. أمانة .. أمانة .. أمانة أمـــــانة يا ليلي يا ليل
سنين فاتت وأنا خالي أنادي الحب وأتمناه
وديني عرفته وبقى لي أمل في الدنيا بستناه
وغني لك يا ليل يا ليل على الفرحان يا ليل يا ليل
ترد عليّ نجوم الليل تقول لي كمان من الأول
أمانة .. أمانة .. أمـــانة .. أمانة أمانة يا ليلي يا ليل
حبيبي البدر لما يبان وعـــــوده الغصن لما يميل
خدوده الورد في البستان عيونه السحر فيها جميل
حبيبي يا ليل .. عروس الليل
على العرسان .. يا ليل طول
أغني له وأقول يا ليل يقول لي كمان من الأول
أمانة .. أمانة .. أمانة .. أمانة أمانة يا ليلي يا ليل

*****

ليلى ابو مدين

04/09/2012, 14h46

والنبي يا جميل

******

كلمات مصطفى الطائر

ألحان كارم محمود

********

والنبي يا جميل حوش عني هواك
دا انا قلبي عليل ودواه وياك
والنبي يا جميل يا جميل يا جميل
حوش عني هواك
والنبي يا جميل يا جميل يا جميل
قلبي المشغول في الحب غريب
والشوق بيطول على كل حبيب
بزياده خصام .. والنبي يا جميل
وابعت لي سلام .. والنبي يا جميل
والنبي يا جميل يا جميل يا جميل
حوش عني هواك
والنبي يا جميل يا جميل يا جميل
دي عينيك السود تسحر ملايين
مين الموعود بجمالهم مين
حوش سحر عينيك .. والنبي يا جميل
اسم الله عليك .. والنبي يا جميل
والنبي يا جميل يا جميل يا جميل
حوش عني هواك
والنبي يا جميل يا جميل يا جميل
يا اعز حبيب دا الشـــــوق بيزيد
مين قال لك غيب يا فايتني وحيد
ليه بعدك طال .. والنبي يا جميل
ابعت مرسال .. والنبي يا جميل
والنبي يا جميل يا جميل يا جميل
حوش عني هواك
والنبي يا جميل يا جميل يا جميل

******

ليلى ابو مدين

04/09/2012, 14h51

عنـــــــــــابي

كلمات كامل الإسناوي

ألحان حلمي أمين

1972
***********

عنابي .. يا عنابي يا خدود الحليوة
أحبابي .. يا أحبابي يا رموش الحليوة
يرضيكوا الحليوة يسيبني للنار اللي بتدوبني
ايه قصده الحليوة .. ايه قصده الحليوة
بتميل العيون على خده بتشاهد جناين ورده
ونسايم عبير بيعدوا لو فات الحليوة
بتهل الروايح منه وبيتقل علينا اكمنه
متأكد وعارف انه امورة وحليوة
يرضيكوا الحليوة يسبني للنار اللي بتدوبني
ايه قصده الحليوة ايه قصده الحليوة
وعيونه يا ناس آه يانا بتصحي قلوب نعسانة
يا مصبح عليه أمانة لا توصي الحليوة
وتقول له انه في أحباب فاتحين للمحبة الباب
من شوق الهوى الغلاب ولا جاش الحليوة
يرضيكوا الحليوة يسيبني للنار اللي بتدوبني
ايه قصده الحليوة .. ايه قصده الحليوة
ياعيني عليك ياقلبي يا كاتم هواك ومخبي
لا تبوح للحليوه بحبي وانا مالي الحليوه
ولأمتى البعاد متقدر انا بسأل عليه وبدور
والفكر بهواه متحير ولا جاش الحليوه
يرضيكوا الحليوة يسيبني للنار اللي بتدوبني
ايه قصده الحليوة .. ايه قصده الحليوة

******

ليلى ابو مدين

04/09/2012, 14h56

ياحلو نادي لي

************
كلمات عبد الفتاح مصطفى

الحان أحمد صدقي

*******

يــــا حلو نادي لي وشــــوف مناديلي
يا حلو نادي لي
عندي حرير هندي والتوب على قدّك
لونه جميل وردي زاهي بلون خدك
والشال ده انا مخليه ليلة الفرح أهديه
واشـــــعل قناديلي ياحلو نادي لي
ودي طرحة بالترتر على حرير قلاب
فوق الجبين تســـحر وتجنن الخطّاب
منســــوجة يا طرحة للعز والفرحة
ولـــــيل مـــــــواويلي ياحــلو نادي لي
يا راكبة تختروان بين الملاح صفين
عندي الحرير ألوان تحتار في حسنه العين
يرخص لك الغالي يا ام المقام عالي
وراضي بقليلي يا حلو نادي لي

******

ليلى ابو مدين

04/09/2012, 15h01

سمرا يا سمرا

********

كلمات أحمد منصور

ألحان كارم محمود

********

سمرا يا سمرا مرَّة في مرَّة شغلني هواكي
دمِّك خفَّة وتاج العفَّة شــــبكني معاكي
سمرا يا سمرا حلوة يا سمرا
سمرا يا حلوة يا لحن يا غنوة يا أحلى رنين
ســــحر الحاجب ده بيتعاجب عالحلوين
شفته بقيت من ناري يا سمرا
تايه كده مش داري يا سمرا
وانتِ الكاس وشفايفك خمرة
يا سمرا يا سمرا حلوة يا سمرا
ورد خدودك جا على عودك زاده جمال
خلّى الشقر يشوفوا السمر يباتوا ف حال
عرفوا النار والغيرة يا سمرا
عاشوا في ذل وحيرة ياسمرا
وانتِ الكاس وشفايفك خمرة
يا سمرا يا سمرا حلوة يا سمرا
بطلب ودِّك ألقى في ردك معنى العفة
أفرح بيكي واقول عليك يا رمز الخفة
ردِّك فيه العزَّة يا ســـمرا
زدتي فْ قلبي معزَّة يا سمرا
وانتِ الكاس وشفايفك خمرة
يا سمرا يا سمرا حلوة يا سمرا

*********

ليلى ابو مدين

04/09/2012, 15h15

مشغول عليك

******

كلمات فتحي قورة

ألحان أحمد صدقي

*****

مشغول عليك مشغول ما اقدرش اغيب عنك
يا ريت عذابي يطول وافضل قريب منك
اه عليك مشغول
لا عشقت بعدك ولا قبلك ولا قلت لك اني بهواك
وكان عزاي اني بقابلك واكلمك واقعد وياك
وبعد ما شغلني جمالك راحت وخلصت ايامي
ضيعت املي بامالك وداويت الامك بالامي
وازاي اخبي وازاي اداري
والوجد فاض بي ولا انت داري
اه عليك مشغول
هويتك وانت ناسيني وقاسى القلب اوهامه
تعال وشوف يا كاويني عذاب البعد والامه
يا اول حب ناداني بقلبي وروحي لبيته
وراح مني وبكاني باول لحن غنيته
يا عشره ما هانت يا ريتها ما كانت
وازاي اخبي وازاي اداري
والوجد فاض بي ولا انت داري
اه عليك مشغول

********

ليلى ابو مدين

04/09/2012, 15h21

على شط بحر الهوى

********

كلمات علي الشيرازي

ألحان محمود الشريف

*****

على شط بحر الهوى رسيِتْ مراكبنا
والشوق جمعنا سوى إحنا وحبايبنا
على شط بحر الهوى ..
سبنا البلاد كلّها وعشنا وحدينا
وكرهنا ناسها وأهلها يتحكَّموا فينا
لا في عوازل عندنا ولا حدِّ جارحنا
عايشين في جنَّة لوحدنا والسعد جارحنا
على شط بحر الهوى ..
بحر الغرام مَيِّتو أحلى من السكَّر
للهوى غِيِّتو لو داقها رح يسكر
واللي يزور حيِّنا يدعي ويتمنَّى
يفرح ويسعد زيِّنا بحبابه يتهنَّى
والشوق جمعنا سوى إحنا وحبايبنا
على شط بحر الهوى ..
لمَّا دعانا الهوى رحنا ولبِّينا
لقينا عندو الدوا طبنا وخبينا
وَقدْ شموع الهنا والنور على جبينو
وجاب كاسات المنا يسقي محبينو
والشوق جمعنا سوى إحنا وحبايبنا
على شط بحر الهوى ..

******

ليلى ابو مدين

04/09/2012, 15h27

يا انا يا العـــــذال

*****

كلمات إسماعيل الحبروك

ألحان محمد الموجي
*******

يا فايتني في حيره مشغول البال
اخترلك خيره يا انا يا العذّال
يا فايتني في حيرة مشغول البال
اختر لك خيرة يا انا يا العذّال
يا انا يا العذّال
يا أنا بأشواقي وأحلامي دايماً حواليك
وبخوفي عليك من أيامي وبغيرتي عليك
يا تروح بجمالك انت وعذالك
يا تروح بجمالك ياخدوك عذالك
وارتاح م الغيرة وده عاد وده قال
اخترلك خيرة يا انا يا العذّال
يا انا يا العذّال
يا أنا بأوهامي وبظنوني وحنيني إليك
والشوق السهران في عيوني يسهر في عينيك
يا تروح بجمالك انت وعذالك
يا تروح بجمالك ياخدوك عذالك
وارتاح م الغيرة وده عاد وده قال
اخترلك خيرة يا انا يا العذّال
يا انا يا العذّال

*****

ليلى ابو مدين

05/09/2012, 13h00

http://www.sama3y.net/forum/flash/editor/menupop.gifعيــــــــــني بترف

*******

كلمات فتحي قورة
ألحان محمود الشريف
******

عيني بترف يا حبة عيني
ياللي سرقتِ النوم من عيني
خير انشالله ده بُعدك والله
والله ده بعدك كان على عيني
ميلي يا حلوة على الجنبين
والله ما شافت زيك عيني
جبتي الحسن ده كله منين
واعمل إيه لو غاب عن عيني
خدتِ القلب بنظرة عين
ياللي في بعدك ما نامت عيني
وعلى عيني ايجيلك .. على عيني
على عيني اسيبك .. على عيني
هنّي القلب بحبك يوم
ياللي خيالك قدَّام عيني
خلِّي عِنيَّ تشوف النوم
لمَّا تصالحي النوم على عيني
لاموا عليَّ وكتر اللوم
خلُّوا هواكي صلوة عيني
وعلى عيني اجيلك .. على عيني
وعلى عيني اسيبك .. على عيني

*****

ليلى ابو مدين

05/09/2012, 13h05

لِحَدْ بُكرا

******

كلمات إسماعيل الحبروك
ألحان محمود الشريف
******

لحد بكرا .. وبعد بكرا
ولحد آخر أيام حياتي
هأفضل أحبك .. وأحب حبك
لحد آخر أيام حياتي
وعشان عيونك .. عمري ما أخونك
لحد آخر أيام حياتي
عايش عشانك .. وحياة غلاوتك
ما أنساش حنانك .. وأنسى قساوتك
وتفوت عليَّّ .. قدام عينيَّّ .. أيام شبابي
لا فرحت بيها .. ولا شفت فيها .. إلا عذابي
قالوا لي عنك .. النار في قربك
وخفت منك .. لكن بأحبك
إزاي شاريني .. والا ناسيني .. يا أعز طيري
دا البعد عني .. ما خادكش مني .. وأداك لغيري
كفايه أحبك .. وتكون حبيبي
وكفايه قلبك .. يكون قريبي
وإن فت جنبي .. تقول دا حبي .. اللي نطرته
وكل ذنبه .. أخلص في حبه .. وأنا هجرته

**********

ليلى ابو مدين

14/09/2012, 23h21

على ورق الورد

*****
كلمات : احمد منصور
غناء كارم محمود

******
على ورق الورد هاكتبلوا
هاكتبلوا واعد
واشرحلوا الود هاشرحلوا
على ورق الورد....على ورق الورد
هاكتبلوا...هاكتبلوا واعد
هابعتلوا سلام واكتبلوا كلام
فيه شوق وهيام راح يفرح بيه
كل ما يقراه راح ينسى الآه
ويزيد في هناه رقة معانيه
مكتوب ع الأد وبخط اليد
على ورق الورد
على ورق الورد هاكتبلوا
هاكتبلوا واعد
هاشرحلوا الود هاشرحلوا
على ورق الورد
هاستنى يومين وابعت جوابين
وابعت جوابين بين يوم واتنين
هايجيني جواب
يوصلني قريب من أغلى حبيب
واتهنى واطيب زي الأحباب
ولا قولش لحد
ولا أحكي لحد
على ورق الورد ...على ورق الورد
هكتبلوا ...هاكتبلوا واعد
واشرحلوا الود هاشرحلوا
على ورق الورد

*******

ليلى ابو مدين

14/09/2012, 23h33

ويل قلبي يا ويل قلبي

****
غناء
كارم محمود
كلمات:...........
الحان:...........

*******

ويل قلبي يا ويل قلبي
ويل قلبي الهوى قتّال
ويل قلبي يا بنت الخال
.....
يا راوية الجسم سّحار
يا راوية القوام ممشوق
يا راوية العيون كتار
لا تخطي زحام السوق
لا تدقي على الخلخال
يا راوية يا بنت الخال
.......
ويل قلبي يا ويل قلبي
ويل قلبي الهوى قتّال
ويل قلبي يا بنت الخال
.......
يا راوية أنا غيران
يا راوية وما بي لوم
يا راوية العيون غزلان
سرّاقة قلوب القوم
داريها وضمي الشال
يا راوية يا بنت الخال
........
ويل قلبي يا ويل قلبي
ويل قلبي الهوى قتّال
ويل قلبي يا بنت الخال
.......
يا راوية الهوى غدّار
والعاشق ملوش بحار
لا تخطي قُصاد الجار
يا راوية بغير حجاب
تحميكي سيوف ورجال
يا راوية يا بنت الخال
.......
ويل قلبي يا ويل قلبي
ويل قلبي الهوى قتّال
ويل قلبي يا بنت الخال
ويل قلبي يا ويل قلبي

*****

ليلى ابو مدين

29/09/2012, 13h08

عرف الشوق يوصلي
******
كلمات : عبد اللطيف البسيوني
غناء : كارم محمود

*******

عرف الشوق يوصلي..بعد الفرقة يا روحي
عرف الشوق يوصلي ..بعد الفرقة ياروحي
تعرف اللي حصلي..تعرف اللي حصلي
بمشي أكلم روحي

*****
بمشي ومتهيألي إنك ماشي معايا
حاجة هاتخطف عقلي وتخليني حكاية
فيه أفكار بإستمرار
قلبي في حيرة تملّي ..تملّي
والأشواق يا روحي
تعرف اللي حصلي ..بعد الفرقة يا روحي
بمشي أكلم روحي
*****
قولّي إزاي أتهرب من أفكار شغلاني
ياللي هويت ومجرب عندك دوا علشاني
إنشغلاتي مالية حياتي
من يوم بُعدك ..بُعدك
ياللي تفديك قلبي وروحي
ياما عشاق من قبلي نسيوا الشوق في ليالي
وإشمعنى أنا مكتوبلي يجرالي اللي جرالي
إمتى زماني يجيبك تاني وافرح قلبي تملي
تملي ..تعرف اللي حصلي ..بعد الفرقة ياروحي
بمشي أكلم روحي..بمشي أكلم روحي

********

فاروق سالم

31/10/2012, 17h45

يا ضنين الأمس
كلمات:مرسي جميل عزيز لحن كمال الطويل
غناء كارم محمود

يا ضنين الأمس مرجو الغد....
هل لدي الأيام لي من موعد
يصل المبعد بالمبتعد
كم غدا أجليت حتي صار أمسا .....
وأخو اللهفة لايعرف يأسا
كلما أفرغ كأسا صب كاسا .....
من مثيل الشوق جم المورد
يا ضنين الأمس مرجو الغد .....
هل لدي الأيام لي من موعد
يصل المبعد بالمبتعد
كلما أذن فجر بشروق .....
يوقذ الأمال في قلب المشوق
وأراني في طريق والطريق .....
ليس فيه غير جفن المسهد
يا ضنين الأمس مرجو الغد .....
هل لدي الأيام لي من موعد
يصل المبعد بالمبتعد
يا بعيد الدار الا في الظنون .....
بين جنبي علي مر السنين
مجمع الأشواق موصول الحنين .....
يتلقي كابظا لي لا يدي
يا ضنين الأمس مرجو الغد .....
هل لدي الأيام لي من موعد
يصل المبعد بالمبتعد

فاروق سالم

31/10/2012, 17h46

ابتهــــــــال.

كارم محمود

الكلمات:الامام زين العابدين على بن الحسين رضى الله عنه

اللهم انى اشهدك وكفى بك شهيدا ,

اللهم انى اشهد انك انت الذى لاالها الا انت ,

عدل فى الحكم رؤوف بالعباد ,

مالك الملك , رحيم بالخلق,

واشهد ان محمدا عبدك و رسولك ,

حملته رسالتك فاداها
انى اشهد انك انت الله الذى لا اله الا انت

فصل على محمد و على اهله الطيبين الطاهرين ,

اللهم انى اشهدك وكفى بك شهيدا ,

انك انت الذى لا اله الا انت.

فاروق سالم

31/10/2012, 17h52

الأب

كارم محمود

ازاي أجازي اللي رعاني علي أفضاله وبأيه أجازيه.

اللي وهب عمره عشاني ووهب ماله ماصعبش عليه.

دا الفضل لله ولأبويا في وجودي أنا وأختي وأخويا.

وازاي أجازي اللي رعاني وبأيه أجازيه

تعب كتير ولالان عزمه لأجل يشوفني في الدنيا رشيد.

ينسي التعب ويزول همه لما يشوفني قدامه سعيد.

والدنيا تحلا له عشاني. ويشوفها احلام وأماني.

با رب خلي لي أبويا في الدنيا أنا وأختي وأخويا.

وازاي أجازي اللي رعاني وبأيه أجازيه.

ياما سهر وشغل باله بمصير أمري وأتمنا ني.

وأتصور الغيب في خياله وسبق عمري قبل أواني.

وعاش بروحه مع الأحلام . واتصور الأمل البسام.

با رب خلي لي أبويا في الدنيا أنا وأختي وأخويا.

وازاي أجازي اللي رعاني وبأيه أجازيه.

العطف والحب صحابي والتضحية حلاقيهم فين.

الا في رضا قلبه الوافي. اللي عليا ما لقيته ضنين.

با رب خلي لي أبويا في الدنيا أنا وأختي وأخويا.

وازاي أجازي اللي رعاني وبأيه أجازيه.

Muzikart

12/03/2020, 23h39