الشاعر الغنائي الشعبي/ فتحي البكوش

[عادل الغزالي]

نبذه عن كتاب ( شعراء الاغنيه المرسكاويه / الشاعر فتحي البكوش)
يعتبر الشاعر فتحي (احمد) علي البكوش من أهم الشعراء الذين اثروا النصوص الشعرية الغنائية الشعبية (المرسكاويه ) وأضافوا أوزان شعرية جديدة , كما تميز الشاعر الغنائي فتحي البكوش بأسلوب جميل في إلقاء الشعر وساهم صحبة الفنان عيسي موسي في إحياء فن ألغيطه , حيث امتاز الشاعر فتحي البكوش بالكتابة في جميع الأوزان الشعرية الشعبية بالاضافه إلي ما أضافه من أوزان جديدة ويعتبر صاحب نقله فنيه بالاغنيه الشعبية ابتدأها منذ بداية العام 1981 ف بعمل( لاأدير صوب ولا غلا من جده ) وأداها الفنان الشعبي المبدع عبد الجليل عبد القادر والتي كان لها ألصدي القوي جدا , ثم بعد ذلك تتابعت إبداعاته مع النصوص الشعرية الغنائية وبمختلف الأوزان الشعرية بالاضافه إلي ما كتبه من أوزان مثل وزن العمل الغنائي الشعبي (هالي قالك .. بكره يقول عليك .. ياغالي كنهو يرضيك ... خوذ فيا الكلام ) والذي لحنه الفنان المبدع الفيتوري احمد (الشيخ) . وغيرها من أعمال شعرية غنائيه أعجبت الكثيرين رغم تحفظ البعض علي شاعريته ولكنني أؤكد علي ذلك فقد عرفت الشاعر الغنائي فتحي البكوش منذ زمن الطفوله واعتبره من ابرز شعراء الاغنيه الشعبيه وخاصة في استهلا ليته لأعماله الشعرية الغنائية وأقول لمن لايعرف فتحي البكوش انه نصف مطرب ونصف شاعر وهذا ما ساعده في خياراته الشعريه الغنائيه , ولكن يعاب عليه التسرع في تكملة كتابة نصوصه الشعريه وكذلك الخروج عن المخاطب في بعض الأحيان أثناء سرده الشعري , ولكن يضل فتحي البكوش شاعرا غنائيا له لونه وبصمته الخاصه , وله العديد والعديد من النصوص الغنائيه بكافة الأوزان والتي تغني بها مطربينا الشعبيين , بل إن بعض أعماله الشعرية قد تمت سرقتها (علانيه ) ( والعيب نحنا معاك لا ما درنا ) وغيرها من أعمال , أحاول استعراضها بعض منها معكم استدلا علي ذلك .

[عادل الغزالي]

1/ غــــــــــــــلا من جده

لاتقيم صوب ولاغلا من جده ..... رام الجفا ياسر الخاطر سده
كيف انسيتي وايش السبب نين بالخطا كافيتي
ايام الغلا ياما معاي زهيتي وياما سقيتك صوب صافي وده
ليش الحيره ليش تكذبي قلتي هنيه غيره
محال ينسي غيتي والجيره يصعب عليه الصوب واعر رده
ياما ذاحت ياما شكت عالصوب ياما ناحت
تريد الغلا يقسم لها مارتاحت لقيت كلام الناس فاوت حده

****************

2/ كامي صوب

كامي صوب ما نقدر نقوله ..... لمن نشكيه عني غاب زوله
لمن نشكي بدايه حشومي فيك ياغالي غلايه
ناوياك ما درنا خطايه حساد الصوب فرقانه كتبوله
كامي يا مرادي دمع العين حرمته ارقادي
وشوق العين وقلبي اللي رمادي يقيم الصوب خلونه انجوله
داوي يا طبيبه جروح الصوب غياتك عجيبه
الناس تقول الغيه موش عيبه وانت تقول مشكايه المولا
يشكنك حياره انضاري دوم في العالي عصاره
عمره يوم ما عاشن صغاره كيف الصقر في العالي مشوله

******************

3/ عزيز دنقر
عزيز دنقرهان الغيات ... حرام جبده وطاري اللي فات
انسن ماقاله وانسن سياته وفعاله
وما تقولن ناره قتاله القسميات... نصيب منلله معطيات
عهده ناسيه اللي قاله ما وفا بيه
صدق قول الحساد عليه وفيما فات .. جفل مني ناسي الغيات
خلاص انسنه ديرن صوب جديد ارعنه
يانظاري مايشوف الجنه عالسيات .... المولي كاتب في لايات


*******************

[عادل الغزالي]

4/ نا والجضر
نا والجضر يانا اليوم رفاقه ... بقيلي تبيعه وما نريد فراقه

جضر بوصوله جضر بالطرب ما فيه قولة لوله
انكنهو نقص فالقول نوفي قوله
لانريد منه لا جمل لاناقه
وكني اوحلت ينوض ينهض طوله
يوفي كلامي وما تخص لباقه
جضر غانيني جضر بالطرب ماهو اللي ساقيني
جضر فالرفق نلقانه مواليني
ماهو منللي رايجات اوثاقه
مكمل احدود الزين مالي عيني

مكمل احدود الزين مالي عيني
نريده احذاي وما نريد طلاقه
عليه كابي دوم الجضر حتن معاي اصحابي
ويريدني من دون كل رفاقي
حالف ايمينا ياخده غنداقه
وفي وين ما نسها يزيد عذابي
يقول الغلا يا مطوله غنداقه
جا يالانه م الكوبري حادر علي جليانه
فات البحر خطم يريد شقانه
لقي الورد عالجنبين زاد اشواقه

***************

5/ زعم يا بعيد الدار

زعم يا بعيد الدار عهدك وافي
والله علي مدعاي هب السافي

زعم نشغلك قوليلي زعم سامره فاليل غير اتسيلي
زعم نخطرو والله تريدي تقيلي
ويرضي غزال الريم بالصفصافي

زعم نشغلك فالغيبه زعم حبنا صافي اليوم حليبه
والله علي مدعاي صارت ريبه
ونزلت علي منهل غلاي اكفافي

كيف عهدك بيه لا رجت لاوالي ايجي عالنيه
فيما مضا كيسانه ممليه
بصوبك اتخليهن اليوم مكافي


******************
6/يالعين بالله

ياعين بالله ما تنسي الغالي
انريدك اتسالي
مو عيب في سباه كان سلتي اليالي

ياعين بالله ما تنسي الغيه .. وتباتي هنيه
وتنسي غلا اللي قبل ناره معاك حيه
ياطول في سباه ما حستي عليه
وزدتي ضلالي
مليت نا مالياس وسمور الليالي

ياعين بالله ما تنسي غلاهم ... وتنوي جفاهم
سبحان لا ما تقول ضليتي وراهم
ياعين نا لوكان نلقالك افداهم
ويبقو حلالي
نرتاح مالغيات واجد ما جرالي

*******************

[عادل الغزالي]

7/ عليك يسالن

لنظار ما نسين عليك يسالن
عليك يذرفن كي عهدهن مازالن

كيف عهدك بيهن لاقوت لانوم الهنا ياتيهن
اذبل حالهن والموح زاري بيهن
وصاف الغلا دونه قسامي حالن

محال تبرد ناره حبك تمكن ياكحيل انضاره
بعد غيتك لنضار دوم عصاره
يموتن وما يقولن لغيرك مالن

*******************

8/ نشيك المن

نشكيك المن ناغير المولي
خاب فيك الضن ليش يا مضلوله
نشكيك لمن يادايه ودوايه نشكيك لمن ياطول رجايه
ناعهدي بيك زينه يامنايه لا ترضي العيب لا تجي مضلوله

نشكيك لمن يانور عيوني حسادك في غيابك لاموني
وين قلت انريد صوبك لاموني خيبتي الضن مانك معدوله

نشكيك لمن والشكوي عيبه ونتي المشكي ونتي الطبيبه
وانتي القاضي ونتي الحبيبه وانا مجروح غايب مرسوله

**********************

9/ خفيـــتني

خفيتني يابو غثيث اسفه
منك عقيلي لا رقد لا غفه

لا رقد لاهاوا دليل خاطري يابو عيون اسقاوا
جرحك تمازه ما تفيد مداوا
ودمعي نزح ما يوم قلت اتكفه

خفيتني مالساعه والعقل بثقاله وراك اداعه
لنضار حاسن حوست البوزاعه
ادردر سماهن ما نهار اصفه

عالحال ما خفيته دليل خاطري يابو عيون فليته
بصوبك صمل من يوم ما جزيته
وعالناس كامي نار ما تطفه

*****************

[عادل الغزالي]

10/ عزيز خطم

عزيز خطم داير مشغال
سريبه طال ... يزازي بالغيه مازال

خطم ياعين الغالي بعد غياب سنين
جفل مني مكحول العين
وياسه طال
يزازي ما يعرف موحال
يزازي بالغيه الغالي هلي دار السيه
في الماضي قال القسميه
وصبري طال
سكب دمعي من العين وسال
طال وطول سريبه ماعاد يحول
الغالي في الغيه ضايل
وزاد ضلال
ورا صوبه ريم الجفال

***************


11/ عليـه شــــــاوي

دمع العين عليه شاوي جرحك جار تعالا داوي

تعالا داويني ياغالي صوبك رازيني
في غيابك ما نامت عيني
كان تعد الغيه داوي

لا لا ما تزيده جرحك جار عليه كيده
ياغالي ساعد تضميده
ياسر من سياتك راوي

عدا ياخساره زول مناي علي تواره
بعد كنا ديمه في داره
الغالي شال رحيلا ناوي


***********************


12/ عليكن يانضاري مكتوب

عليكن يانضاري مكتوب
بغيرذنوب ... ندير عزيز يخون الصوب

عليكن يانضاري مكتوب مسطر م الباري
عزيز يجفي الغيات وداري
والمكتوب
حكم ربي وما منه هروب

عليكن وارضنه حكم ربي ونتن طيعنه
اللي خان الغيات انسنه
وديرن صوب
مع غيره وقولن محبوب

عليكن م العالي فراقه خزرة عين البالي
لبيّض بو لنياب مجالي
دار ذنوب
بعد لامان وخان الصوب

************

[عادل الغزالي]

13/ منك يم عيون اسقاوا

منك يم عيون اسقاوا خليتي الخاطر ما ياوا

يم عيون وساعي خليتي الخاطر مداعي
ورا زولك زايد فوجاعي
نازف جرحي ما يداوا

يم عيون كحيله بقي الخاطر صايف عن جيله
بالله عالحب احكيله
من ديك بالكي يضاوا

يم عيون كبيره بقي الخاطر مذهوب الشيره
من جرك باقي في حيره
مجروح ومالقيش نجاوا

******************

14/ صهده جوا

حبك سكن فالقلب صهده جوا موش كذب موش قولت لفالا توا

موش يوم وليله حبك لفالي من اسنين طويله
علي ما جرالي م الزمان ويله سريب غيتك مازال هوا هوا
عروقه معا قلبي عروق نجيله الناس جزوها وهي اتقوا

موش تو لفالي صوبه قديم معاي ذيبل حالي
يزيد الغلا وآنا يزيد ضلالي نعبد صليب نقول هوا هوا
نصبر نقول نشيلهن من بالي نلقا سريب غلاك زاد تقوا

كامي ناره امحصن علي الحساد والنقاره
لا يحكما زلزال لا طياره بوهذب فات الطول نين ملوا
مبني علي سطوة نضاف عقاره لا سيل مهما كان صايم نوا

سكن جزاهن لنضار ضاقن والدوا ما جاهن
الحاصل يعنن في عذابه راهن خوف الشماته ما حكن بالدوا


15/ كذاب
كذاب ما يقدر جديد يحيده غلا لولي شاعل بنار جديده
مابا يحول واقد بناره شاعله كي لول
ضقنا زها واجد معاه وطول حكم ياس شالنا اديار بعيده
لوعته بزياده حرقة فوادي شاعله وقاده
الخاطر تهاياله انسيه ارقاده سمح المسايل لولي وتهميده


*************************

[عادل الغزالي]

15/ العيــــب
العيب نحنا معاك لا ما درنا ولا يوم نرضو ينكسر خاطرنا

ليش اتكافي الود بالعيبه تريد ريافي
تحساب الغلا بالسيف خللك جافي
اصحاب قدر ما نحبو اللا بخاطرنا

ياما رينا ايام معكوسات ما شاكينا
مفيت الكريم الحي يلطف بينا
نعيشو عقاب العمر بيه عصرنا

ياما قالو حساد فينا من كلام وشالو
ناوين عالسيات هم مازالو
وحنا معاهم يوم ما قصرنا



**************

17/غلطان راني

غلطان راني سامحني ريح ضميري وريحني
هل المره سامح عقيلي ما تضره
فراقك صعيب وما مره
قدام ناسي مبرحني

ياسي هدا مدعي غلايا وما ردا
نطلب المولي في شدا
يرجع حبيبي جارحني

غير كنك غلطه مني وغلطه منك
هكي انضاري يبنك
انسامح انا وتسامحني

**************

18/ مـا تــلوم عليــهن
متلوم عليهن يبن غاليهن
رجاهن فالله يقسم ويجيهن
يدعن مولاهن يجيبه يالاهن
مشاط القصه الدمعه ينسيهن
توا يبنه في الحوش يشوفنه
ما يبن بكره يطول عليهن
ايموتن دونه كحال عيونه
لبّاس الموضه بحبا كاويهن

*****************

[عادل الغزالي]

19/ بغيـــته
بغيته صقر العلالي خايف من ياسه وناره
احكوله ياناس حالي قولوله مالي دباره
سابل جنحانه عليه وصوبي ناوي فراقه
رزاني ماني رميه كحيل خزرة ارماقه
وعيني لصوبه دعيه ولايل رامت وثاقه
اللي ديمه حايم عليه صياد طيور الحباره
دللني صقر النداوي دلالي جاني وريته
ثاريته للصوب ناوي اللي عيونه سوده فليته
سمرني والعقل شاوي جفيتا ياسي رميته
سقاني م الصوب راوي نقيمو الصوب وعصاره


***********************

20/ غزال الدفه

زولك فات غزال الدفه ... عقلي خفه... ساق وعين ودور اسفه
بدور اطوال غلبتيها ريم الجفال
حدر لاعند ازرارك طال
الريح اتهفه ... كان جاته يصّاعب لفه

سبحانه جاب سوا اسود من لون اغراب
اعيونك م الضلمه تحساب
الضي اطفه...... لكن برق اخدودك خفه

نعاند ما زال علي ساقك مي يجي خلخال
الحاصل يم اهذوب اطوال
هميل الدفه ..... اوصافك ماهوشي موالفه


******************


21/ بعد ياسك

بعد ياسك كان مبكيك اليوم اخطيك ازهي ياعين انتي وغاليك

بعد ياس ومــّر وسمرة ليل وطول جضر
اقسملك خزرة عين الحر
مبروك عليك ...... تهنيبا زوله غاليك

زادت لنوار شعل ضيك في وسط الدار
واجد ضقناهن لقهار
معاد تجيك ....... اللا الفرحه انتي وغاليك

بجاه الصلّاح تعيشي ديمه في لفراح
الهم اللي قدامك زاح
اليوم ناويك مرادك ياعيني يهنيك

******************

[عادل الغزالي]

22/ غثيثك

غثيثك وعيونك والساق... تقول ابراق... خدودك سبحان الخلاقك

كلا لعيون شهاده ما ريتلهن لون
معاي شبن ماهن من دون
عليك ارماق ..... طبيعه ما هنشي بزواق

كلا مشيتها تدلع وين عيني رتها
مصبوب الساق وركبتها
صب اوثاق ..... علي بانن ماهنش ارقاق

خدك يابنيه وين قابل متقاوي ضيه
زاد فوقه جمه مسفيه
عيون عناق ..... جميله يا زينة لخلاق



************************

23/ غلا صادني

غلا صادني فالقلب ناواريته غلا بوعيون مهلعات فليته

صادني من مده وعالناس واريته فوان الشده
وما هو اللي يدري ولا يجده ولا يوم شاورلي ولانا جيته

مو بيديه جاني غلا من ناس ماهي ليه
حاسن علي لنضارقالن سيه يطيعن غلا غير العزيز وصيته

ياما جالن لنضار في سباه ياما جالن
سوايا عرب واجدين نين انهالن بالدمع سالن يا علم واريته

ما لقيت ادباره بيش نوصله زول وداره
ولنضار شاغلهن ودوم سماره لاهوجفا ولاناللي شاكيته

غيتا كاميها لاقدرت نوصفها ولا نشاكيها
خايف علي عيني او واحل فيها تريد الغلا قالت علم ولقيته

****************

24/ هللي قالك
هللي قالك بكره يقول عليك ياغالي كنهو يرضيك خوذ فيا الكلام
شيال الخبر ناوي عالجرر
انكان سرك ضهر ما ينفع ملام

ما نديرو العيب ولا نهونو حبيب
لا دمع لا تسكيب لا نديرو الحرام

كان جابو السريب قوللهم حبيب
عني مو غريب حمال الملام

قوللهم معايا ما يحمل بلايا
زايد في زهايا يا حاسد حرام

انقالولك يعيب قوللهم قريب
عني ما يغيب وما يغير كلام

******************

[abuaseem]

اشكر الاستاذ عادل الغزالي على تعريفنا بالشاعر الفنان فتحي البكوش. و استميح اخي عادل عذرا لانني سمحت لنفسي باعادة توزيع ما رفعه لنا من اعمال شعرية ليتسنى قراءتها بطريقة اسهل.

[محمد بوشيبه]

تشكر استاذى الكريم على هذه اللفته الطيبة عن احد اقطاب الفن الشعبى المعاصر وهو ألأستاذ المناظل فتحى البكوش احد ابرز كتاب ألأغنية الشعبية فى بنغازى واهم عوامل تطور الكلمة والقافية واحد ابرز الوان الشعبية والتى اثرت فى اجيال كثيرة وكلماته التى تعد مأثورا شعبيا يعنى بدراسة وألأهتمام .. وكما اسلف استاذ عادل فشاعرنا الكبير نصف مطرب ونصف شاعر وهو من اشهر مؤدى ..( الغيطه) هو واللأستاذ الكريم المحبوب ( عيسى موسى ) اطال الله فى اعماركم وامدكم بصحة والسعادة ..مع تمنياتى لكم بمزيدا من الهمة وألأستمرار

[صالح العوكلي]

شكرا لكم على هذه القطوووووووف